قازاقستاندا بانكروت دەپ تانىلعاندار اراسىندا 79 جاستاعى قاريا بولعان
بانكروت دەپ تانىلعانداردىڭ اراسىندا ەر ازاماتتار 58 پايىزدى قۇرادى. بۇل تۋرالى قارجى ۆيتسە-ءمينيسترى ەرجان ءبىرجانوۆ ءمالىم ەتتى، دەپ حابارلايدى Kazinform.
اتاپ ايتقاندا، قازىر جەكەلەگەن بورىشكەرلەر كەيبىر زاڭنامالىق كەدەرگىلەردىڭ سالدارىنان بانكروتتىق ءراسىمىن كەڭىنەن قولدانا الماي وتىر.
«قازىر ءتيىستى زاڭنامالىق وزگەرتۋلەر دايىنداپ جاتىرمىز. بىرىنشىدەن، سوتتان تىس بانكروتتىققا جاتاتىن قارجى ۇيىمدارىنىڭ تىزبەسىن كەڭەيتۋ ەسكەرىلگەن. سەبەبى، قازىر ءبىرقاتار قارجى ۇيىمدارى (ليتسەنزياسىنان ايىرىلعان، جابىلعان) ءتيىستى تىزىمدە بولماعاندىقتان، ءبىراز ادام ءوتىنىش بەرە الماي وتىر. سوندىقتان زاڭناماعا وزگەرىس ەنگىزبەكپىز»، - دەدى ە. ءبىرجانوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
مۇنىمەن قوسا، ازاماتتاردى سوتتان تىس بانكروتتىقتى قولدانۋ تۋرالى وتىنىشكە قوسىمشا قۇجاتتاردى قوسا بەرۋ مىندەتىنەن بوساتۋ قاراستىرىلعان. قاجەت مالىمەتتەردى ءتيىستى ۇيىمداردىڭ دەرەكقورىنان الۋ جوسپارلانعان.
سونىمەن قاتار، تولەم قابىلەتتىلىگىن قالپىنا كەلتىرۋ جوسپارى بەكىتىلگەننەن كەيىن، بورىشكەردىڭ شەتەلگە شىعۋىنا تىيىمدى الىپ تاستاۋ ەسكەرىلگەن.
«ستاتيستيكاعا قاراعاندا، بانكروت دەپ تانىلعانداردىڭ اراسىندا ەر ازاماتتار 58 پايىزدى، ال ايەلدەر 42 پايىزدى قۇرادى. بانكروتتىق بەرىلگەن ەڭ ەگدە جاستاعى ادام 79 دا ەكەنى انىقتالدى. ول كىسى قىزىلوردا وبلىسىندا تۇرادى. ەڭ جاسى الماتى وبلىسىنىڭ تۇرعىنى - 20 جاستا»، - دەدى ۆيتسە-مينيستر.
ونىڭ سوزىنە قاراعاندا، ادامداردىڭ كوبىسى وزدەرىنىڭ قارىزىنىڭ سوماسىن تولىق بىلمەيدى.
بۇدان بۇرىن حابارلانعانداي، 9 ميلليارد تەڭگەدەن استام بورىش سوماسىنا 6,4 مىڭ ادام بانكروت دەپ تانىلدى.
