قازاقستاندا بالا كۇتۋشىسىنىڭ قىزمەتى قانشا تۇرادى

استانا. KAZINFORM - قازاقستاندا بالا كۇتۋشىسى قىزمەتىنىڭ ەڭ ارزانى قاي وڭىردە ەكەنىن Kazinform اگەنتتىگىنىڭ ءتىلشىسى انىقتاپ ءبىلدى.

бала күтуші
Коллаж: Kazinform

قازاقستاندىقتار كوبىنە 1 - 3 جاس ارالىعىنداعى بالالارىنا بالا كۇتۋشىسىن ىزدەيدى. بىرگە تۇرۋدى قالايتىندارى از. بالا باعاتىن ادام ويناتىپ، كىشكەنتايلاردىڭ بار جاعدايىن جاساۋى ءتيىس. ال ەسىن بىلەتىن بالالاردى بالاباقشاعا اپارىپ-اكەلۋ، مەكتەپ پەن ۇيىرمەلەرگە تاسۋ كەرەك.

бала күтуші
Фото: Kazinform

ەلىمىز بويىنشا بۇل قىزمەت قوستانايدا ارزان بولىپ شىقتى. مۇندا قىزمەت كورسەتۋشى ادام ۇيىنە بارادى نەمەسە كۇتۋشىگە اپارىپ تاستايدى. بۇل قىزمەت ساعاتىنا 800-1500 تەڭگە تۇرادى. ال اگەنتتىك ارقىلى قىزمەت كورسەتسە ساعاتىنا 2500 تەڭگە الادى. ەگەر ۇيدە قوسىمشا كومەك كورسەتسە كۇنىنە 5000-10000 تەڭگە سۇرايدى. بالا كۇتۋشىسىنىڭ اي سايىنعى قىزمەتى - 110-120 مىڭ تەڭگە.

ورالدا دا قىزمەت قولجەتىمدى. مۇندا بالا كۇتۋشىلەرى ساعاتىنا 1000-1500 تەڭگە الادى. ال اي سايىنعى جالاقىسى 100-150 مىڭ تەڭگە.

شىمكەنتتە بالا باعاتىن ادام ۇيىڭىزگە كەلەدى. ونىڭ قىزمەتى ساعاتىنا 1200-1500 تەڭگە. ال ەگەر بالاڭىزدى ورتالىققا اپارىپ تاستاساڭىز، ونداعى قىزمەت ساعاتىنا 1000-1200 تەڭگە. ەگەر بالانىڭ اياعى شىقپاعان بولسا، قوسىمشا اقى تولەۋگە تۋرا كەلەدى. مۇندا بالا باعاتىن ادام اي سايىن 150-300 مىڭ تەڭگە سۇرايدى.

تالدىقورعاندا ساعاتىنا قىزمەت كورسەتەتىن بالا كۇتۋشىلەرى 1000-2000 تەڭگە سۇرايدى. ولاردىڭ اي سايىنعى جالاقىسى 150-200 مىڭ تەڭگە. سەمەيدە دە ءدال وسىنداي ۇسىنىس مەن سۇرانىستى كورۋگە بولادى. مۇندا دا باعا ساعاتىنا 1000-2000 تەڭگە. ال ايىنا 110-150 مىڭ تەڭگە (كوبىنە اسپاز قىزمەتى قوسا ۇسىنىلادى) تۇرادى.

تارازدا بالانى ءبىر ساعات باعىپ وتىرۋ قىزمەتى ساعاتىنا 800 تەڭگە (بالانى ورتالىققا اپارۋ كەرەك) تۇرادى. ال بالا كۇتۋشىسى ۇيىڭىزگە بارسا، ساعاتىنا 1000-3000 تەڭگە تولەيسىز. اي سايىنعى قىزمەت قۇنى شامامەن 100-120 مىڭ تەڭگە تۇرادى.

اقتوبەدە ساعاتىنا 1500 تەڭگە سۇرايدى. قىزىلوردادا دا ءدال وسى باعا. اقتوبەدە بالا كۇتۋشىسىنىڭ اي سايىنعى جالاقىسى 170-280 مىڭ تەڭگە، ال قىزىلوردادا 60 مىڭنان باستالىپ 200 مىڭ تەڭگەگە (ول بالا كۇتۋشىسىنىڭ قايدا تۇراتىنىنا بايلانىستى) جەتەدى.

جەزقازعان، قاراعاندى، پەتروپاۆل قالالارىنىڭ تۇرعىندارى بالا كۇتۋشىسىن ءبىر ساعاتقا شاقىرسا 2000 تەڭگە تولەيدى. ال ءبىر ايدىڭ جالاقى ءار وڭىردە ءارتۇرلى. جەزقازعاندا 70 مىڭ تەڭگەدەن باستالىپ 200 مىڭعا جەتەدى. قاراعاندىدا 140 مىڭنان باستالىپ 200 مىڭ تەڭگەگە دەيىن بارادى. ال پەتروپاۆلدا باعا 100 مىڭ تەڭگەدەن باستالادى. سونىمەن بىرگە وندا ساعات 9:00 دەن 17:00 گە دەيىن بالا باققان ادام 5000 تەڭگە (سۇرانىس كوبىنە بالا كۇتىمىمەن ۇيدە وتىرعان كوپبالالى انالاردان تۇسەدى) الادى.

كوكشەتاۋدا بالا كۇتۋشىسىنىڭ اي سايىنعى قىزمەتى 150-200 مىڭ تەڭگە تۇرادى. ال ساعاتىنا 2000-2500 تەڭگە سۇرايدى.

پاۆلودارلىقتار بالاسىن باعاتىن ادامنىڭ ۇيىنە اپارىپ تاستاپ، ساعاتىنا 800-900 تەڭگە تولەيدى. ال ۇيىنە شاقىرسا 2000-3000 تەڭگە بەرەدى. ەگەر بالا كۇتۋشىسى تۇندە باعىپ بەرسە، قىزمەت قۇنى 15000 تەڭگەگە (ساعات 19:00 دەن تاڭعا دەيىن) جەتەدى. اي سايىنعى قىزمەت قۇنى - 250-300 مىڭ تەڭگە.

تۇركىستاندا دا ءدال وسى باعا. بالا كۇتۋشىسى ساعاتىنا 2000-3000 تەڭگە الادى. ال ءبىر ايلىق قىزمەتى 100-120 مىڭ تەڭگە تۇرادى.

قونايەۆتا بالانى ءبىر ساعات باعىپ بەرەتىن كۇتۋشى 2000-6000 تەڭگە الادى. ال اي سايىنعى قىزمەت قۇنى 110-120 مىڭ تەڭگە.

اتىراۋدا بالاعا ءبىر ساعات باس- كوز بولىپ وتىرۋ قىزمەتىنىڭ قۇنى 2000-8000 تەڭگە. بالا كۇتۋشىلەرىنىڭ ءبىر ايلىق قىزمەتىنىڭ قۇنى - 140-160 مىڭ تەڭگە.

وسكەمەندە بالا كۇتۋشىسىنىڭ ءبىر ساعاتتىق قىزمەتى 2500-3000 تەڭگە تۇرادى. ال اي سايىن 80-120 مىڭ تولەۋگە بولادى.

ەڭ قىمباتى - اقتاۋ قالاسىندا. مۇندا بالا كۇتۋشىلەرىنىڭ ءبىر ساعاتتىق قىزمەتى 3000-5000 تەڭگە تۇرادى. ال اي سايىنعى قىزمەت قۇنى 150-250 مىڭ تەڭگە.

الماتىدا بالا كۇتۋشىسى ساعاتىنا 2000 تەڭگە الادى. ال ەگەر بالا كۇتۋشىسى ءۇي يەسىمەن بىرگە تۇرسا اي سايىن 200 مىڭ تەڭگە تولەيدى. بارىپ- كەلىپ قىزمەت كورسەتسە ايىنا 350 مۆڭ تەڭگە سۇرايدى. سونىمەن بىرگە الماتىدا دەمالىس كۇندەرى دە بالا كۇتۋشىسىنىڭ قىزمەتىن (قىزمەت قۇنى - 15000 تەڭگە) پايدالانۋعا بولادى.

ەلوردادا بالانى ءبىر ساعات باعىپ بەرۋ قۇنى 2000-8000 تەڭگە تۇرادى. اي سايىنعى قىزمەت قۇنى - 350-500 مىڭ تەڭگە. استانادا كوبىنە بالا كۇتۋشىسى ءۇي يەسىمەن بىرگە تۇرادى. ءارى بالانى ساعاتىنا ەمەس، قاجەت كەزدە بىرنەشە جىل بويى باعىپ بەرۋگە شاقىرادى.

Kazinform بۇعان دەيىن فوتوگراف ادامدار قىزمەتىنىڭ باعاسىن سالىستىردى.

سوڭعى جاڭالىقتار