قازاقستاندا بالا اسىراپ الۋمەن كاسىبي اينالىساتىن وتباسىلار بولادى
ق ر وقۋ-اعارتۋ ۆيتسە-ءمينيسترى ەدىل وسپان ءماجىلىس دەپۋتاتتارىنا ءبىلىم بەرۋ جانە بالا قۇقىقتارىن قورعاۋ ماسەلەلەرى جونىندەگى جاڭا زاڭ جوباسىن تانىستىردى، دەپ حابارلايدى Kazinform.

زاڭ جوباسى ەكى كودەكسكە جانە 5 زاڭعا وزگەرىستەر مەن تولىقتىرۋلار ەنگىزۋدى كوزدەيدى.
ونىڭ ماقساتى – ق ر ورتا، تەحنيكالىق جانە كاسىپتىك ءبىلىم، ورتا بىلىمنەن كەيىنگى ءبىلىم بەرۋ، قوسىمشا ءبىلىم بەرۋ جانە بالالاردىڭ قۇقىقتارىن قورعاۋ سالاسىنداعى زاڭناماسىن جەتىلدىرۋ، سونداي-اق، قۇقىقتىق ولقىلىقتاردى، قايشىلىقتاردى جويۋ بولىپ وتىر.
«بۇل رەتتە زاڭ جوباسىمەن ۇسىنىلاتىن نەگىزگى نوۆەللالار كەلەسىدەي - بالالاردى اسىراپ الاتىن كاسىبي وتباسى ينستيتۋتىن ەنگىزۋ، بالالارعا ارنالعان قوسىمشا ءبىلىم بەرۋ ۇيىمدارى ءۇشىن حابارلاما ءتارتىبىن ەنگىزۋ، مەنشىك نىسانىنا قاراماستان، ءبىلىم بەرۋ ۇيىمدارىندا بالالاردىڭ جەكەلەگەن ساناتتارىنىڭ قولداۋ الۋعا قۇقىقتارىن كەڭەيتۋ، تەحنيكالىق جانە كاسىپتىك ءبىلىم بەرۋ باعدارلامالارى بويىنشا ونلاين وقىتۋدى ەنگىزۋ. بۇگىنگى تاڭدا رەسپۋبليكامىزدا 22 مىڭنان استام جەتىم جانە انا-اتا قامقورلىعىنسىز قالعان بالا بار. مەملەكەت تاراپىنان جۇرگىزىلگەن ساياسات ناتيجەسىندە 12 جىلدا بالالار ءۇيىنىڭ تاريبەلەنۋشىلەرى سانى 4 ەسەگە، بالالار ۇيلەرىنىڭ سانى - 2,5 ەسەگە ازايدى. قازىرگى ۋاقىتتا ءبىلىم، دەنساۋلىق الەۋمەتتىك قورعاۋ سالالارىنا قارايتىن 116 ۇيىمدا 3509 جەتىم جانە اتا-انا قامقورلىعىنسىز بالالار بار»، - دەدى ە. وسپان ماجىلىستە.
بالانى قابىلدايتىن كاسىبي وتباسىلار ينستيتۋتىن ەنگىزۋدە جاڭا تاسىلدەر ۇسىنىلادى.
ماسەلەن، بالا تابىلعان سوڭ بالالار ۇيىنە ەمەس، بىردەن وتباسىنا تابىستالادى.
ءاربىر بالا اتا-انانىڭ نازارىمەن جانە قامقورلىعىمەن قامتىلۋى ءۇشىن ءبىر كاسىبي وتباسىنداعى بالا سانى تورتەۋدەن اسىرىلمايدى.
اسىراپ الۋشى اتا-انالاردىڭ جاسى 30-53 ارالىعىندا بولادى، بالانى قابىلدايتىن كاسىبي وتباسى مارتەبەسىن الۋعا ۇمىتكەر وتباسىلار پسيحولوگيالىق دايارلىقتان جانە قامقورشىلىق جانە قورعانشىلىق ورگانداردا اككرەديتتەۋدەن وتەدى.
پسيحولوگيالىق دايىندىقتى جەتىم بالالارعا ارنالعان ءبىلىم بەرۋ ۇيىمدارى جۇزەگە اسىرادى.
اتالعان ۇيىمدار وقىتۋ قورىتىندىسى بويىنشا ءوز ۇسىنىمىن دايىندايدى.
قورعانشىلىق ورگاندار كاسىبي وتباسى ۇمىتكەرلەرىنىڭ زاڭناما تالاپتارىنا سايكەستىگىن قارايدى جانە دايىندالعان قورىتىندىعا تالداۋ جۇرگىزىپ، ناتيجەسى بويىنشا ۇمىتكەر وتباسىن اككرەديتتەۋدەن وتكىزەدى.
«سونداي-اق، زاڭ جوباسىندا وتباسىلارعا جىبەرىلەتىن بالالار ساناتىن كەڭەيتۋ ۇسىنىلادى. ەندى وتباسىلارعا جەتىم جانە اتا-انا قامقورلىعىنسىز قالعان بالالارمەن قاتار پاناسىز، قاراۋسىز قالعان ارنايى الەۋمەتتىك قولداۋعا مۇقتاج بالالاردى دا ورنالاستىرۋدى ۇسىنىپ وتىرمىز. ماتەريالدىق ىنتالاندىرۋ ءۇشىن ءاربىر جەتىم بالانى اسىراپ-باعۋعا 10 ا ە ك مولشەرىندە اي سايىنعى جاردەماقى جانە بالالاردىڭ وتباسىندا بولۋ مەرزىمىنە بايلانىستى ءاربىر كاسىبي تاربيەشى قىزمەتىنە 70 ا ە ك اقى تولەۋ كوزدەلگەن. ۇسىنىلىپ وتىرعان جاڭا ينستيتۋت جەتىم جانە اتا-انا قامقورلىعىنسىز قالعان بالالاردىڭ جانە پاناسىز، قاراۋسىز قالعان بالالاردىڭ وتباسىندا تاربيەلەنۋ قۇقىعىن قامتاماسىز ەتۋگە باعىتتالعان ماڭىزدى قادام بولماق»، - دەيدى ۆيتسە-مينيستر.