قازاقستاندا اۋىز سۋ تاپشىلىعى بولمايدى - مينيسترلىك

  جىل سايىن قازاقستان اۋماعىندا 102,3 تەكشە شاقىرىم سۋ قورى جينالادى. ونىڭ ىشىندە 1,2 تەكشە شاقىرىمى، ياعني، جالپى سۋ كولەمىنىڭ %1 دان استامى تۇرعىنداردى اۋىز سۋمەن قامتۋعا جۇمسالادى، دەپ حابارلايدى Kazinform.

پارلامەنت ءماجىلىسىنىڭ دەپۋتاتى سەرگەي پونوماريەۆپەن ديالوگ بارىسىندا سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى بولات بەكنياز تۇرعىنداردى ساپالى اۋىز سۋمەن قامتاماسىز ەتۋ جۇمىسى تۋرالى ايتتى.

ەكونوميكانىڭ قاجەتتىلىگى ءۇشىن جىلدىق سۋ تۇتىنۋ شامامەن 25 تەكشە شاقىرىمدى قۇرايدى.

ونىڭ 65 پايىزى - اۋىل شارۋاشىلىقتىڭ، 25 پايىزى - ونەركاسىپ قاجەتتىلىكتەرىنە باعىتتالادى.

«سول سەبەپتى قازاقستاندىقتار اۋىز سۋدان تارىعادى دەپ ايتۋعا بولمايدى. بارلىق نورماتيۆتىك قۇجاتتاردا، سۋ كودەكسىندە ەڭ ءبىرىنشى ورىندا ازاماتتارىمىزدى اۋىز سۋمەن قامتاماسىز ەتۋ ماسەلەسى تۇر. ءبىز الداعى 2 جىلدا ەلىمىزدىڭ بارلىق ءوڭىرىن ورتالىقتاندىرىلعان سۋ جۇيەسىمەن قامتاماسىز ەتۋدى جوسپارلاپ وتىرمىز. قانداي تابيعي جاعداي بولماسىن، كليمات وزگەرىسى نەمەسە ترانسشەكارالىق سۋ رەسۋرستارىنىڭ ازايۋى اۋىز سۋ تاپشىلىعىنا اكەلمەيدى. سەبەبى تۇرعىندارعا قاجەتتى اۋىز سۋ كولەمى جالپى سۋ قورىنىڭ %1 ىن عانا قۇرايدى»، - دەدى سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى بولات بەكنياز.