قازاقستاندا ايەلدەر كوبىنە قاي سالالاردا ەڭبەك ەتەدى

استانا. KAZINFORM - قاي ەڭبەك سالاسىندا ايەلدەردىڭ ۇلەسى باسىم؟ ەلىمىزدە ايەلدەر مەن ەركەكتەردىڭ جالاقىسى تەڭ بە؟ وسى جانە وزگە دە سۇراقتارعا قازاقستان كاسىپوداقتار فەدەراتسياسىنىڭ ءتوراعاسى ساتىبالدى داۋلەتالين جاۋاپ بەردى.

«مەملەكەت قابىلداپ جاتقان كەشەندى شارالارعا قاراماستان، گەندەرلىك ساياساتتى ىسكە اسىرۋدىڭ پارمەندى تەتىكتەرىن ازىرلەۋ ماسەلەسى وزەكتىلىگىن جوعالتپايدى. ايەلدەردىڭ قوعامدىق ومىرگە تولىققاندى تارتىلۋىنا كەدەرگى كەلتىرەتىن جەكەلەگەن كەدەرگىلەر ساقتالۋدا. ەڭ الدىمەن، ەڭبەك سالالارىن «ەرلەر» جانە «ايەلدەرگە» ارنالعان دەپ ءبولۋ. بۇگىندە ءبىلىم بەرۋ، دەنساۋلىق ساقتاۋ جانە الەۋمەتتىك قىزمەت كورسەتۋ سالالارىندا قىزمەتكەرلەردىڭ %70 ايەلدەر. بۇل سالالاردا جالاقى دەڭگەيى ناقتى ەكونوميكا سالالارىنا قاراعاندا ءبىرشاما تومەن»، - دەدى ساتىبالدى داۋلەتالين ەلوردادا ءوتىپ جاتقان قازاقستان ەڭبەكشى ايەلدەرىنىڭ 1-فورۋمىندا.

ونىڭ ايتۋىنشا، قۇقىقتاردىڭ تەڭدىگى مەن قوعامدا ايەلدەردىڭ جوعارى بەلسەندىلىگىنە قاراماستان، ەرلەر مەن ايەلدەر جالاقىسىنىڭ ايىرماشىلىعى بار.

«تاجىريبە كورسەتكەندەي، ايەلدەر ءۇي شارۋاشىلىعىنا دەمالىس كۇندەرى كۇنىنە ورتا ەسەپپەن 4,5 ساعات جانە جۇمىس كۇندەرى 2 ساعاتتان استام ۋاقىت جۇمسايدى. بۇل ەرلەرمەن سالىستىرعان شامامەن 2 جانە 4 ەسە كوپ. ايەلدەردىڭ جۇمىسپەن قامتىلۋى، ولاردىڭ ەڭبەگىنە ءادىل اقى تولەۋ مەملەكەتتىڭ الەۋمەتتىك جانە ەكونوميكالىق ساياساتىنىڭ ورتالىعىندا بولۋعا ءتيىس. جۇمىس ىستەيتىن ايەلدەر، وتباسىلىق مىندەتتەرى بار ادامدار ءۇشىن الەۋمەتتىك كەپىلدىكتەردى كۇشەيتۋ، تۇرمىستىق جانە ەڭبەكتەگى ايەلدەردى كەمسىتۋدىڭ كەز كەلگەن تۇرىنە جول بەرمەۋ تالاپ ەتىلەدى»، - دەيدى ول.

كاسىپوداقتار ءتوراعاسى مالىمدەگەندەي، ەڭبەك ايەلدەرىنىڭ 1-فورۋمىنىڭ ماقساتى - قۇرىلىمدىق جاڭعىرۋ جاعدايىندا قازاقستان ايەلدەرىنىڭ ەكونوميكالىق مۇمكىندىكتەرىن كەڭەيتۋگە، ولاردىڭ الەۋمەتتىك مارتەبەسى مەن گەندەرلىك تەڭدىگىن ارتتىرۋعا ىقپال ەتۋ.

ايتا كەتسەك، 2025-جىلدى قازاقستاندا گەندەرلىك تەڭدىك جىلى دەپ جاريالاۋ ۇسىنىلدى.