قازاقستاندا اۆتونەسيە كولەمى رەكوردتىق دەڭگەيگە جەتتى
الماتى. قازاقپارات - 2025-جىلدىڭ 1-قاڭتارىندا اۆتونەسيە پورتفەلى 3,6 تريلليون تەڭگەگە جەتتى. ءبىر جىل ىشىندە ول 44,8 پايىزعا نەمەسە 1 119,3 ميلليارد تەڭگەگە ءوستى.

ءبىرىنشى نەسيەلىك بيۋرو باس ديرەكتورى رۋسلان وماروۆ اۆتونەسيە نەسيەلەۋدىڭ ەڭ قارقىندى دامىپ كەلە جاتقان سالاسى ەكەنىن اتاپ ءوتتى.
ونىڭ مالىمەتىنشە، جاسالعان اۆتونەسيە بويىنشا كەلىسىمشارتتاردىڭ جالپى سانى 591 مىڭنان استى. ال بورىشكەرلەر سانى 559,2 مىڭ شاماسىندا. ەكى كورسەتكىش تە وتكەن جىلمەن سالىستىرعاندا ارتقانىن كورسەتتى.
— ءبىز اۆتونەسيە بويىنشا رەكوردتى ەكىنشى جىل قاتارىنان كورىپ وتىرمىز. 2023-جىلى ءوسىم 64 پايىز بولسا، 2024-جىلى - 44 پايىز. ياعني، نەگىزگى پورتفەل تۇراقتى ديناميكاسىن كورسەتۋدى جالعاستىرىپ جاتىر، — دەدى ول.
بىلتىر بەرىلگەن اۆتونەسيە كولەمى - 1,8 تريلليون تەڭگە. بۇل 2023-جىلمەن سالىستىرعاندا 13,2 پايىزعا ارتىق. نەسيە الۋشىلاردىڭ سانى 214 مىڭ ادامعا جەتىپ، 10,2 پايىزعا ءوستى، ال جاسالعان شارتتار - 228,4 مىڭ. الدىڭعى جىلمەن سالىستىرعاندا 5,7 پايىزعا كوپ.
اۆتونەسيە شارتتارى بويىنشا ورتاشا قارىز 8 ميلليون تەڭگە شاماسىندا. بۇل وتكەن جىلمەن سالىستىرعاندا 7,1 پايىزعا نەمەسە 529,5 مىڭ تەڭگەگە ارتىق. ورتاشا قارىز 10,8 پايىزعا نەمەسە 742,3 مىڭ تەڭگەگە ءوسىپ، 7,6 ميلليون تەڭگەگە جەتتى.
— كولىكتىڭ ورتاشا قۇنى - 10 ميلليون تەڭگە، — دەدى ول.
سونداي-اق سپيكەر جەلتوقسان ايىندا 25600 كولىك ساتىلعانىن، ال بەرىلگەن نەسيەلەر سانى 26,7 مىڭ بولعانىن اتاپ ءوتتى.
بەرىلگەن اۆتونەسيەنىڭ جالپى سوماسى وتكەن جىلمەن سالىستىرعاندا 13,2 پايىزعا وسسە، اۆتوكولىكتەر 6,4 پايىزعا قىمباتتادى. نەسيەنىڭ ەڭ كوپ كولەمىن ەكىنشى دەڭگەيلى بانكتەر بەرگەن - 3039,8 ميلليارد تەڭگە.
بۇعان دەيىن ەلدەگى كولىكتەردىڭ جارتىسىنا جۋىعىنىڭ شىققانىنا 20 جىلدان اسىپ كەتكەنى تۋرالى جازعان ەدىك.
سونداي-اق ونەركاسىپ جانە قۇرىلىس ءمينيسترى باسپا ءسوز ءماسليحاتىندا 4 پايىزدىق اۆتونەسيە نەگە كەلمەسكە كەتكەنىن ايتقان بولاتىن.