قازاقستاندا ەڭ ارزان ليموندى قاي وڭىردەن ساتىپ الۋعا بولادى؟

استانا. KAZINFORM - كۇن سالقىنداعان كەزدە ادامدار سۋىق ءتيىپ اۋىرادى. سول كەزدە يممۋنيتەتتى كوتەرىپ، س دارۋمەنىنە باي ونىمدەردى تۇتىنادى. ونىڭ كوزى - ليمون. Kazinform اگەنتتىگىنىڭ ءتىلشىسى ەلىمىزدىڭ وڭىرلەرىندەگى ليمون باعاسىن سالىستىردى.

قازاقستان بازارلارىنا ليمون تۇركيا، وزبەكستان (تاشكەنت)، وڭتۇستىك افريكا، قىتاي، مەن ارگەنتينادان جەتكىزىلەدى. سونىمەن بىرگە ەلىمىزدىڭ وڭتۇستىك وڭىرلەرىندە ليمون وسىرىلەدى. دەگەنمەن تۇركيا مەن تاشكەنتتەن اكەلىنەتىن تسيترۋس قولجەتىمدى. بۇل ءونىمدى بازار سورەسىنەن ءجيى كەزىكتىرۋگە بولادى. قازاقستان بويىنشا ليموننىڭ كەلىسى ورتا ەسەپپەن 1000-1200 تەڭگە تۇرادى. ءبىر داناسى شامامەن 150-200 تەڭگە تۇرادى.

قاراعاندى بازارلارىندا تاڭداۋ مول. سوعان سايكەس باعا دا اركەلكى. مۇندا وڭتۇستىك افريكادان جەتكىزىلگەن ليموننىڭ كەلىسى 850 تەڭگەدەن باستالادى. ال قىتايدان اكەلىنگەن تسيترۋستىڭ كەلىسى 900 تەڭگە تۇرادى. ارگەنتينا ءونىمى كەلىسىنە - 1000 تەڭگە. قاراعاندىدا جەرگىلىكتى «توپار» ليمونىن دا ساتىپ الۋعا بولادى. قۇنى كەلىسىنە 2500 تەڭگە تۇرادى.

شىمكەنت پەن ورالدا ليموننىڭ كەلىسى 900-1000 تەڭگە تۇرادى. بۇل لوموننىڭ قابىعى قالىڭ بولىپ كەلەدى. شىمكەنتكە قابىعى جۇقاسى تۇركيا مەن تاشكەنتتەن جەتكىزىلەدى. كەلىسى 1165-1500 تەڭگە تۇرادى.

جەزقازعاندا ليموننىڭ كەلىسى 900-1400 تەڭگە تۇرادى. ال قوستانايدا يمپورتتالعان تسيترۋستىڭ ەڭ ارزانى كەلىسىنە 949 تەڭگەدەن ساتىلىپ جاتىر. وزبەكستاننان اكەلىنگەن سۇرپى 1699 تەڭگە تۇرادى. مۇندا ءبىر دانا ليمون شامامەن 220-230 تەڭگەگە شىعادى.

ارگەنتينادان اكەلگەن ليموننىڭ كەلىسى تارازدا 950 تەڭگەدەن ساتىلىپ جاتىر. ال تاشكەنتتەن جەتكىزىلگەنى 1390 تەڭگە.

قىزىلوردا، پەتروپاۆل، وسكەمەن، سەمەي جانە اقتوبەدە ليموننىڭ كەلىسى ورتا ەسەپپەن 1000-1200 تەڭگە تۇرادى. قىزىلوردانىڭ كەي جەرلەرىندە ليمون كەلىسى 1500 دەپ كورسەتىلگەن.

كوكشەتاۋدا ليمون باعاسى 1000-1400 تەڭگە دەپ قۇبىلىپ تۇر. الماتى مەن قونايەۆتا قىتايدان اكەلىنگەن ليموننىڭ كەلىسى 1000 تەڭگە تۇرادى. دەمەك ءبىر داناسى 120-150 تەڭگەگە شىعادى.

تاشكەنتتىڭ ليمونى 1200 تەڭگەگە ساۋدالانىپ جاتىر. سايكەسىنشە ءبىر داناسى 150-200 تەڭگە بولادى.

اتىراۋ سۋپەرماركەتتەرىندە ءبىر كەلى ليمون باعاسى 1080 تەڭگە. ال قاراپايىم عانا دۇكەندە كەلىسى 1200 تەڭگە. ءبىر ليمون ساتىپ العىڭىز كەلسە 200 تەڭگە تولەيسىز.

تالدىقورعاندا ليمون كەلىسى ورتا ەسەپپەن 1350 (تاشكەنت) جانە 1100 (قىتاي) تەڭگە تۇرادى.

استانادا تۇرىك ليمونىنىڭ كەلىسى 1199 تەڭگە تۇرادى. وزبەكستاننان اكەلىنگەن ليمون قۇنى دا وسى شامادا. تەك دۇكەندەردە %16 جەڭىلدىكپەن ساتىلىپ جاتىر.

پاۆلوداردا ليموننىڭ كەلىسى 1200 تەڭگە تۇرادى. ال ەڭ قىمبات تسيترۋس تۇركىستاندا ساتىلىپ جاتىر. مۇندا كەلىسى - 1500 تەڭگە.

ساتۋشىلاردىڭ ايتۋىنشا، ليمون باعاسىنا بىرنەشە فاكتور اسەر ەتەدى. ليموننىڭ قايدان اكەلىنگەنى، قانشالىقتى ۇزاق ساقتاۋعا بولاتىنى ماڭىزدى. سونىمەن بىرگە قاتتى نەمەسە جۇمساق بولسا دا (قاتتىسى جاقسى بولادى) باعاعا اسەرى بار. تۇتىنۋشىلارعا قابىعىنىڭ جۇقا بولعانى جاقسى. مۇنداي ليمون كوبىنە تاشكەنتتەن اكەلىنەدى. ونىڭ ءدامى دە ەرەكشە. سوندىقتان دا تۇركياعا قاراعاندا وزبەكستاننان جەتكىزىلەتىن ليمون باعاسى جوعارى.

ليموندى ۇزاق ساقتاۋ ءۇشىن تەمپەراتۋرا 5 گرادۋستان جوعارى بولماۋى ءتيىس. سونىمەن بىرگە پوليەتيلەن پاكەتىنە سالۋعا بولمايدى. ول كەزدە كوپ ۇزاماي بۇزىلىپ، ءشىري باستايدى.