قازاقستاندا اليمەنتكە قاتىستى زاڭ قالاي وزگەرۋى مۇمكىن

استانا. KAZINFORM - قازاقستاندا اليمەنتكە قاتىستى جاڭا زاڭ جوباسى ازىرلەنەدى. بۇل جونىندە بالا قۇقىقتارى جونىندەگى ۋاكىل دينارا زاكيەۆا سەناتقا ءتيىستى ۇسىنىسپەن جۇگىنگەن.

بورىشكەردى ىزدەستىرۋ پروتسەسىندەگى كەدەرگىلەر

ۋاكىلدىڭ ايتۋىنشا، اليمەنت ەڭ از دەگەندە تومەنگى كۇنكورىس دەڭگەيىمەن شامالاس، ياعني 43 مىڭ تەڭگە بولۋى قاجەت. سونىمەن قاتار، سوت ورىنداۋشىلارىنا بورىشكەردىڭ بانك ەسەپشوتتارى تۋرالى مالىمەتتەردى سۇراۋعا مۇمكىندىك بەرۋدى جانە اليمەنت تولەۋشىلەردىڭ جۇمىس ورىندارىنا جالاقى مولشەرىن حابارلاۋدى مىندەتتەۋ كوزدەلىپ وتىر.

«قازىرگى ۋاقىتتا بورىشكەردى ىزدەستىرۋ تالاپكەردىڭ، ياعني اليمەنت الۋشىنىڭ تىركەلگەن مەكەنجايى بويىنشا جۇرگىزىلەدى. بۇل - اقىلعا قونىمسىز جانە ءتيىمسىز، سەبەبى اليمەنت الۋشى باسقا وڭىردە نەمەسە ءتىپتى باسقا ەلدە تۇرۋى مۇمكىن. مىسالى، بورىشكەر تۇركىستان وبلىسىندا تۇرسا، ىزدەستىرۋ ماڭعىستاۋ وبلىسىندا جۇرگىزىلەدى، ويتكەنى اليمەنت الۋشى ماڭعىستاۋ وبلىسىندا تۇرادى. وسىلايشا، قارىز الۋشىلاردى تابۋ ءىس جۇزىندە مۇمكىن ەمەس»، - دەدى د. زاكيەۆا.

اليمەنتتى كوبەيتۋمەن ماسەلە شەشىلمەيدى

جۋىردا سەناتور جاننا اسانوۆا وسىنداي تولەمدەردى ەسەپتەۋ ءتارتىبىن قايتا قاراۋدى ۇسىندى. دەپۋتاتتىڭ ايتۋىنشا، «نەكە (ەرلى-زايىپتىلىق) جانە وتباسى تۋرالى» كودەكستە اليمەنت ءبىر بالاعا اتا-انا تابىسىنىڭ تورتتەن ءبىرىن قۇرايتىنى كورسەتىلگەن. اليمەنت تولەيتىن اتا-انا كوبىنەسە ءىس جۇزىندە ەڭ تومەنگى جالاقىنى 85 مىڭ تەڭگە ەتىپ كورسەتىپ، كىرىسىن تومەندەتىپ جۇرەدى. ناتيجەسىندە ءبىر بالاعا اليمەنت نەبارى 22 مىڭ تەڭگە بولادى.

«اليمەنت تاقىرىبى تۇتاس قوعامدى الاڭداتىپ جۇرگەن ماسەلە ەكەنى بەلگىلى بولدى. بالا قۇقىعى جونىندەگى ۋاكىل دينارا زاكيەۆا زاڭ جوباسى جونىندە سەناتقا ۇسىنىس ەنگىزدى. ال ءبىز ءماجىلىس دەپۋتاتتارىمەن بىرلەسىپ، ارنايى جۇمىس توبىن قۇردىق جانە زاڭ جوباسىن ازىرلەۋگە كىرىستىك. قازىر جان-جاقتى تالداۋ جۇرگىزىپ جاتىرمىز، الدىن الا ەشتەڭەنى كەسىپ ايتا المايمىز. ويتكەنى، بار ماسەلە اليمەنت مولشەرىن كوبەيتۋمەن شەشىلە سالمايدى. مۇندا اتا-انانىڭ دا، بالانىڭ دا، اليمەنت الۋشىنىڭ دا، بەرۋشىنىڭ دە جاعدايىن ءادىل ەسكەرۋىمىز كەرەك. سوندىقتان دا بۇل - وتە كۇردەلى جۇمىس»، - دەيدى سەنات دەپۋتاتى.

11 مىڭ ايەل اليمەنت تولەپ ءجۇر

ال ادىلەت مينيسترلىگى اليمەنت بورىشى تۋرالى رەسمي ستاتيستيكانى جاريا ەتتى. بۇگىنگى تاڭدا رەسپۋبليكا بويىنشا سوت ورىنداۋشىلارىنىڭ ورىنداۋىندا اليمەنت ءوندىرىپ الۋ تۋرالى 322 مىڭ اتقارۋشىلىق ءىس بار. ونداعى 311 مىڭنان استام بورىشكەر - ەر ازامات بولسا، 11 مىڭنان استام بورىشكەر ايەل بار.

«بيىلعى 9 اي ىشىندە 33 ميلليارد تەڭگە سوماسىنا 25 مىڭ ءوندىرىس پروبلەمالى بولىپ تانىلدى، ياعني بورىشكەر اليمەنتتەرىن تۇراقتى تۇردە تولەمەيدى. دەگەنمەن ادىلەت مينيسترلىگى اتقارعان اۋقىمدى جۇمىس ناتيجەسىندە بيىل 7 ميلليارد تەڭگە سوماسىنا اليمەنت بويىنشا بەرەشەك ءوندىرىلدى. اليمەنت تۋرالى وندىرىستەردىڭ %95,6 ى بويىنشا ءوندىرىپ الۋ اي سايىن جۇمىس بەرۋشىلەردىڭ بۋحگالتەرلىك قىزمەتتەرى ارقىلى جۇزەگە اسىرىلادى»، - دەپ جازىلعان مينيسترلىك حابارلاماسىندا.

اۆتور
ايجان سەرىكجان قىزى