قازاقستاندا الەۋمەتتىك ماڭىزى بار ونىمدەردىڭ باعاسى تومەندەۋدە

استانا. KAZINFORM - جىل باسىنان بەرى 21-مامىرعا دەيىن رەسپۋبليكادا الەۋمەتتىك ماڭىزى بار ونىمدەر باعاسىنىڭ ءوسۋى %0,2 عا دەيىن باياۋلادى. وتكەن اپتادا كورسەتكىش -%0,1 قۇرادى.

الەۋمەتتىك ماڭىزى بار ونىمدەردىڭ قازىرگى باعاسى قاتىستى جاعداي 25-مامىر، سەنبى كۇنى ۇكىمەتتە ۆيتسە-پرەمەر سەرىك ءجۇمانعاريننىڭ توراعالىعىمەن وتكەن كەزەكتى كەڭەستە قارالدى.

ءبىر اپتا ىشىندە قىرىققابات بىردەن %10,4 عا ارزاندادى، وعان تۇركىستان وبلىسىندا جاڭا ءونىم الۋ اسەر ەتكەن. ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆا اتاپ وتكەندەي، قىرىققاباتتى ساتىپ الۋعا ساۋدا جەلىلەرى قوسىلدى، ىشكى نارىق جاپپاي تولىعىپ جاتىر.

كۇنباعىس مايى (%0,6)، قاراقۇمىق جارماسى %0,4، C1 ساناتىنداعى تاۋىق جۇمىرتقاسى (%1,4) باعاسىنىڭ تومەندەۋى جالعاسۋدا. سونىمەن قاتار «تومەن باعالار» توبىندا سۇزبە (%0,2)، تاۋىق ەتى (%0,2)، ايران مايلىلىعى %2,5 (%0,4)، تۇز (%0,1) جانە 1 سۇرىپتى بيداي ۇنى (%0,1) بار.

اۋىل شارۋاشىلىعى مينيسترلىگى تاراپىنان تۇراقتاندىرۋ قورلارىنداعى كوكونىس قورلارىنىڭ كولەمى بويىنشا دەرەكتەر ايتىلدى. وڭىرلەرگە كۇزگى ءونىمدى كەلەسى ماۋسىمارالىق كەزەڭگە جەتكىزۋگە فورۆاردتىق شارتتار جاساسۋ بويىنشا جۇمىس جۇرگىزۋ تاپسىرىلدى.

سەرىك جۇمانعارين وڭىرلەرگە الداعى اپتا ىشىندە باعانى تۇراقتاندىرۋدى قامتاماسىز ەتۋدى جانە قاجەتتى كولەمدە جاڭا ءونىم جەتكىزۋدى جەدەلدەتۋدى تاپسىردى.