قازاقستاندا الكوگولدىك ىشىمدىكتەن باس تارتقان نەشە اۋىل بار
استانا. KAZINFORM - ىشكى ىستەر ءمينيسترىنىڭ ورىنباسارى يگور لەپەحا الكوگولدىك ىشىمدىكتەن تولىقتاي باس تارتقان اۋىلداردىڭ سانىن جاريالادى.
«قازاقستاندا جالپى وسىنداي 97 اۋىل بار. ونىڭ ىشىندە قاراعاندى وبلىسىندا - 50 اۋىل، تۇركىستان وبلىسىندا – 7، قوستاناي وبلىسىندا - 6 اۋىل، اقتوبە وبلىسىندا – 5، جامبىل وبلىسىندا – 5، ش ق و- دا – 4، قىزىلوردا وبلىسىندا – 3، ۇلىتاۋ جانە باتىس قازاقستان وبلىستارىندا ەكى اۋىلدان، سونداي-اق ماڭعىستاۋ، جەتىسۋ، پاۆلودار وبلىستارىندا ءبىر اۋىلدان. بىزدە وسى ەلدى مەكەندەردىڭ اتاۋى بار»، - دەدى ي. لەپەحا سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، مۇنداي شەشىمدى اتالعان اۋىلداردىڭ تۇرعىندارى وزدەرى قابىلداعان جانە وعان ىشكى ىستەر مينيسترلىگىنىڭ ەش قاتىسى جوق.
«بۇل باستامانى اۋىل تۇرعىندارى وزدەرى جاسادى. وسىنى ەستىگەننەن كەيىن، ءبىز ءتيىستى مونيتورينگ جاسادىق. بۇل رەتتە، اتالعان اۋىلداردا قۇقىق بۇزۋ دەرەكتەرى ايتارلىقتاي ازايعانىن بايقادىق. وسى ەلدى مەكەندەردە الكوگولدىك ىشىمدىك ساتىلمايدى جانە ونى ەشكىم ساتىپ المايدى»، - دەدى ءمينيستردىڭ ورىنباسارى.
