قازاقستاندا العىس ايتۋ كۇنىنە ارنالعان 500 دەن اسا ءىس-شارا وتەدى
استانا. KAZINFORM - ناۋرىزدىڭ العاشقى كۇنى - العىس ايتۋ كۇنىنە وراي مادەني مەكەمەلەر جالپى 514 ءىس-شارا ۇيىمداستىرادى. قازاقستاندىقتار بۇل كۇنى قايىرىمدىلىق كونسەرتتەرى مەن تەاترلاندىرىلعان قويىلىمدار جانە كورمەلەر تاماشالاپ، ءتۇرلى اكسيالارعا قاتىسادى.
ق ر مادەنيەت جانە اقپارات مينيسترلىگى باسپا ءسوز قىزمەتىنىڭ حابارلاۋىنشا، بۇگىن ەلوردادا قازاقستانداعى العاشقى كوپۇلتتى «BIRLIK» ءان-ءبي ءانسامبلىنىڭ تۇساۋكەسەرى وتەدى. روزا باعلانوۆا اتىنداعى «قازاق كونسەرت» جانىنان قۇرىلعان شىعارماشىلىق ۇجىم جاندى اسپاپتىق سۇيەمەلدەۋ ارقىلى كاسىبي دەڭگەيدە الەم حالىقتارىنىڭ بيلەرىن ورىندايدى. ونىڭ ماقساتى وسكەلەڭ ۇرپاقتى ءتۇرلى ۇلتتىڭ ونەرى مەن مادەنيەتىن تانىستىرۋعا، ۇلتتىق مادەني كودتى جانە قازاقستاننىڭ كوپۇلتتىلىعى مەن بىرلىگىن نىعايتۋعا باعىتتالعان.
الماتىدا مەملەكەتتىك اكادەميالىق ءبي تەاترى، قۇدىس قوجامياروۆ اتىنداعى رەسپۋبليكالىق مەملەكەتتىك اكادەميالىق ۇيعىر مۋزىكالىق كومەديا تەاترى، «سالتانات» مەملەكەتتىك ءبي ءانسامبلى جانە «قازاقستان كامەراتى» كلاسسيكالىق مۋزىكا ءانسامبلى قايىرىمدىلىق كونسەرتتەرىن وتكىزەدى.
شىمكەنتتە «العىس كەرۋەنى»، «العىس كەشى» ءىس-شارالارى ۇيىمداستىرىلادى. سونداي-اق قالا كىتاپحانالارىندا تاقىرىپتىق كورمەلەر مەن وقۋ ساعاتتارى جوسپارلانعان.
جەتىسۋ وبلىسىندا «العىسىم شەكسىز» اكتسياسىن ىسكە قوستى. ءىس-شارا اياسىندا بارشا تۇرعىندار مەن قوناقتارعا مەرەكەنىڭ سيمۆولى سانالاتىن قۇرت تاراتىلادى.
جامبىل وبلىسىندا «جامبىل - مەنىڭ ءجاي اتىم، حالىق - مەنىڭ شىن اتىم» رەسپۋبليكالىق اقىندار ايتىسى، شىعىس قازاقستان وبلىسىندا «اق بوساعا» جانە «التاي» ءبي جانە فولكلورلىق-ەتنوگرافيالىق انسامبلدەرىنىڭ قاتىسۋىمەن «بارىڭە العىس - بلاگودارنوست ۆسەم» مەرەكەلىك كونسەرتى وتەدى.
اباي وبلىسىندا دا قايىرىمدىلىق اكسيالارى، تاقىرىپتىق كورمەلەر، كەزدەسۋلەر مەن مەرەكەلىك كونسەرتتەر وتەدى.
ماڭعىستاۋ وبلىسىنداعى «بەينەۋ» اۋداندىق مادەنيەت ءۇيىنىڭ قىزمەتكەرلەرى العىس ايتۋ كۇنىنە وراي «تەگىن تاكسي» قىزمەتى ۇسىنىلادى.
