قازاقستاندا العاش رەت بالانىڭ باۋىرى مەن جۇرەگىنە ءبىر ۋاقىتتا وتا جاسالدى

استانا. KAZINFORM - ونى انا مەن بالا ۇلتتىق ورتالىعىنىڭ دارىگەرلەرى شەتەلدىك تاجىريبەگە سۇيەنە وتىرىپ ىسكە اسىردى.

дәрігер
Фото: видеодан алынған кадр

وتا كەزىندە الدىمەن ناۋقاستىڭ باۋىرىنىڭ وڭ جاق بولىگىندەگى، كەيىن بىردەن قان تامىرىنداعى ىسىك الىنعان.

«بۇل - اسا سيرەك كەزدەسەتىن جاعداي» دەيدى دارىگەرلەر. الەم بويىنشا بۇنداي وپەراتسيا نەبارى ون رەت جاسالعان.

داستان رۇستەموۆ - بالالار حيرۋرگى. ونىڭ وسى سالادا جۇرگەنىنە 14 جىلعا تايادى.

تاجىريبەلى دارىگەر وسى ارالىقتا اۋىر حالدەگى جۇزدەگەن بالانى قۇلان-تازا ايىقتىردى. تالاي مارتە كۇردەلى وتا جاساپ، سان ءتۇرلى دەرتكە داۋا تاپتى.

الايدا، جاقىندا ول الەمدە اسا سيرەك كەزدەسەتىن جاعدايمەن بەتپە-بەت كەلدى. وبىرعا شالدىققان ءبىر جارىم جاسار بالانىڭ بۇيرەگىندەگى ىسىگى اسقىنىپ، جۇرەككە شاپقان.

بالانى قۇتقارۋدىڭ جالعىز جولى - ەكى مۇشەگە قاتار وتا جاساۋ بولاتىن. سوندىقتان دارىگەرلەر كونسيليۋمى جاساندى قان اينالىمىن ورناتۋعا شەشىم قابىلدادى.

ياعني، جۇرەككە تۇتىك ورناتىپ، باۋىردىڭ وڭ جاق بولىگىن جانە قان تامىرلارداعى ىسىكتى العان.

- بالانىڭ دەنەسىن 20 گرادۋسقا دەيىن توڭازىتىپ، قان اينالىمىن توقتاتىپ، 20 مينۋتتاي جۇرەگىن اشىپ جۇرەك جاقتان باۋىر جاقتان قان تامىردا ىسىگىن الىپ، سوسىن جۇرەكتىڭ سىرتىنداعى قابىعى پەريكارت دەپ اتالادى. سودان كەسىپ الىپ، سول جەردە ءوزىنىڭ جۇرەك قابىمەن جاماپ تىكتىك. باۋىردىڭ وزىندە بولسا، ونىڭ زاقىمدالعان جەرىن كەسىپ الىپ تاستار ەدىك، - دەيدى UMC انا مەن بالا ورتالىعىنىڭ دەپارتامەنت ديرەكتورى، بالالار حيرۋرگى داستان رۇستەموۆ.

وتا سەگىز ساعاتقا سوزىلعان. وعان مەديتسينا قىزمەتكەرلەرىنىڭ ەكى بريگاداسى جۇمىلدىرىلدى.

قازىر بالانىڭ جاعدايى جاقسى. دارىگەرلەر ونى ۇدايى باقىلاۋدا ۇستاپ وتىر.

- بالا اۋرۋحاناعا قاڭتاردا اكەلىندى. وسى ۋاقىتقا دەيىن بىرنەشە حيميوتەراپيادان ءوتتى. سونىڭ ارقاسىندا قاتەرلى ىسىك الدەقايدا كىشىرەيدى. دەگەنمەن تولىق ايىعىپ كەتۋىنە وتا قاجەت بولدى. قۋانىشىمىزعا وراي، ءبارى ءساتتى ءوتتى. ءبۇلدىرشىن وسىدان ەكى كۇن بۇرىن اۋرۋحانادان شىعىپ، ۇيىنە ورالدى. ءبىراق جاعدايىن قاداعالاپ وتىرامىز، - دەپ اتاپ ءوتتى بالالار كارديوحيرۋرگى عالىمجان وتەگەنوۆ.

انا مەن بالا ۇلتتىق ورتالىعىندا وسىعان دەيىن جيىرمادان استام باۋىر ترانسپلانتاتسياسى جاسالعان.

ءبىراق، وتاندىق دارىگەرلەردىڭ تاجىريبەسىندە باۋىر مەن جۇرەككە ءبىر ۋاقىتتا وتا جاساۋ بۇرىن-سوڭدى بولماعان.

ويتكەنى وبىردىڭ بۇل تۇرىنە الەم بويىنشا 10 ناۋقاس قانا شالدىققان.

سوڭعى جاڭالىقتار