قازاقستاندا العاش رەت بالالار اۋرۋحاناسىندا ويىن الاڭى اشىلدى
اتىراۋ. KAZINFORM - اتىراۋ وبلىستىق بالالار اۋرۋحاناسىنداعى بەس بولىمشەدە كامەلەتكە تولماعان ناۋقاستار ءۇشىن ويىن الاڭى اشىلدى. وعان دەمەۋشىلىك كومەكپەن 4 ميلليون تەڭگەگە جۋىق قارجى جۇمسالعان.
اتىراۋ وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتىنەن مالىمەتىنشە، بالالار اۋرۋحاناسىندا جىلىنا 7 مىڭعا جۋىق ناۋقاس قابىلدانادى.
ناۋقاس بالالاردىڭ 70 پايىزى - شۇعىل، ال، 30 پايىزى - جوسپارلى ەمدەلۋ ماقساتىندا تۇسەدى.
«بالالارى ەم الاتىن اتا-انالار تاراپىنان كوپتەگەن ۇسىنىس ءتۇسىپ ءجۇر. سوعان بايلانىستى ويىن الاڭدارى وبلىستىق بالالار اۋرۋحاناسىنىڭ تراۆماتولوگيا، پەدياتريا، حيرۋرگيا، نەۆرولوگيا، رەابيليتاتسيا جانە وتورينولارينگولوگيا بولىمشەلەرىندە جابدىقتالدى»، - دەپ حابارلادى باسقارمانىڭ باسپا ءسوز قىزمەتى.
دەمەۋشى كومپانيانىڭ باس ديرەكتورى ءاليا جاقسىلىقوۆانىڭ ايتۋىنشا، ويىن الاڭدارىن جابدىقتاۋ جۇمىسى قازان ايىندا باستالعان.
«بۇل - ءبىزدىڭ قايىرىمدىلىق شارامىز. اۋرۋحانادا ەمدەلەتىن بالالاردىڭ ويلاۋ قابىلەتىن دامىتۋعا ۇلسە قوسىقىمىز كەلدى. سول ماقساتپەن ويىن الاڭدارى بالالاردىڭ اقىل- ويىن جەتىلدىرۋگە قاجەتتى قۇرال-جابدىقتارمەن قامتاماسىز ەتىلدى»، - دەيدى ءاليا جاقسىلىقوۆا.
ونىڭ ايتۋىنشا، ويىن الاڭدارىنا كۇردەلى جوندەۋ جۇرگىزىپ، قۇرال-جابدىقتارمەن قامتۋعا 4 ميلليون تەڭگەگە جۋىق قارجى جۇمسالعان.
ەسكە سالا كەتەلىك، بۇدان بۇرىن اتىراۋداعى جارىلىستان زارداپ شەككەن ەكى بالانىڭ جاعدايى ءالى دە اۋىر ەكەنىن جازعان ەدىك.
