قازاقستاندا العاش رەت انالار كۇنى تويلانىپ جاتىر
استانا. KAZINFORM - انالار كۇنى - الەمنىڭ كوپتەگەن ەلدەرىندە اناعا قۇرمەت كورسەتىپ، ونىڭ مەيىرىمى مەن قامقورلىعى ءۇشىن العىس ايتۋ ماقساتىندا اتاپ وتىلەتىن ماڭىزدى مەرەكە. وسىعان وراي مادەنيەت جانە اقپارات مينيسترلىگى ەلىمىزدەگى جاڭا مەرەكەگە شولۋ جاسادى.
مەرەكە مامىر ايىنىڭ ەكىنشى جەكسەنبىسىندە الەمنىڭ 20 دان استام ەلىندە تويلانادى.
ولاردىڭ قاتارىندا ا ق ش، كانادا، گەرمانيا، يتاليا، بەلگيا، دانيا، فينليانديا، ەستونيا، تۇركيا، جاپونيا، برازيليا جانە اۋستراليا بار.
ال بۇلاردان بولەك ەلدەر بۇل مەرەكەنى باسقا كۇنى اتاپ وتەدى. 2024 -جىلى بۇل مەرەكە قازاقستاندا 12-مامىردا العاش رەت تويلانىپ وتىر.
انانى قورعاۋ - مەملەكەتتەگى الەۋمەتتىك ساياساتتىڭ باسىم مىندەتتەرىنىڭ ءبىرى.
«شىن مانىندە، ءاربىر ادام ءۇشىن انادان ۇلى، انادان قىمبات ەشكىم جوق. ەڭ قاستەرلى قۇندىلىقتارىمىز «جەر- انا»، «وتان- انا» ۇعىمدارىمەن تىعىز بايلانىستى. «اتا ۇلدى، انا ۇلتتى تاربيەلەيدى» دەيدى. بۇل ءسوزدىڭ ايرىقشا ءمان- ماڭىزى بار»، - دەگەن ەدى مەملەكەت باسشىسى قاسىم-جومارت توقايەۆ.
ءبىزدىڭ وتباسىلىق ومىرىمىزدە دە، قوعامدىق ومىرىمىزدە دە انانىڭ ءرولى ەرەكشە، ول بالالارىن تاربيەلەپ، باعىت-باعدار بەرەدى.
انانىڭ ەڭبەگى ءاردايىم جوعارى باعالانادى.
ەلدى مەكەندەردە بالالار مەن جاستاردى تاربيەلەپ، ۇلتتىق قۇندىلىقتاردى جاڭعىرتۋ ماسەلەسىن شەشۋ ءۇشىن، قازاقستانداعى ايەلدەرىن بىرىكتىرەتىن قازاقستان حالقى اسسامبلەياسىنىڭ «انالار كەڭەسى» جۇمىس ىستەيدى.
قازىرگى ۋاقىتتا رەسپۋبليكالىق انالار كەڭەسىندە ەلدىڭ وبلىستىق، قالالىق، اۋداندىق، اۋىلدىق دەڭگەيلەرىندە 1713 بولىمشە بار (ونىڭ ىشىندە 17 وبلىستىق، 56 قالالىق، 159 اۋداندىق، 1481 اۋىلدىق جانە ەتنومادەني بىرلەستىكتەر جانىندا)، ولاردىڭ قۇرامىنا 16051 ايەل كىرەدى.
6-مامىر مەن 12-مامىر ارالىعىندا بارلىق وڭىردە 600 دەن استام ءتۇرلى ءىس-شارا ءوتتى.
جالپى، انالار كۇنىن مەرەكەلەۋ انانىڭ قوعامداعى ءرولىن ارتتىرۋعا، ءار ازاماتتىڭ اتا- اناسىنا قۇرمەت كورسەتىپ، العىس ايتا بىلۋگە تاربيەلەۋ، جاستاردىڭ رۋحاني-ادامگەرشىلىك قاسيەتتەرىن قالىپتاستىرۋعا، وتباسى ينستيتۋتىن ساقتاۋعا جانە نىعايتۋعا باعىتتالادى.
