قازاقستاندا 50 جاستان اسقان ەرلەر تەگىن سكرينينگتەن وتەدى
استانا. KAZINFORM - دەنساۋلىق ساقتاۋ ءمينيسترى اقمارال ءالنازاروۆا ماجىلىستە وتكەن ۇكىمەت ساعاتىندا بيىلدان باستاپ سكرينينگتىڭ جاڭا 2 ءتۇرى ەنگىزىلەتىنىن ايتتى.

«2026-جىلدان باستاپ ساقتاندىرۋ جۇيەسىنە جەرگىلىكتى بيۋجەت قاراجاتى ەسەبىنەن 1 ميلليوننان استام ازاماتتى تارتۋعا مۇمكىندىك بەرەتىن زاڭ جوباسى ازىرلەندى. بۇل ازاماتتاردىڭ قالتا شىعىندارىن ەداۋىر تومەندەتۋگە جانە ولاردىڭ قارجىلىق قورعالۋىن قامتاماسىز ەتۋگە باعىتتالعان. ەكىنشىدەن، ءبىرىڭعاي پاكەتتەردى قالىپتاستىرۋ. ونىڭ نەگىزگى ماقساتى - قىزمەتتەردىڭ قايتالانۋىن بولدىرماۋ، ازاماتتاردىڭ الەۋمەتتىك مارتەبەسىن ەسەپكە الۋ جانە ساقتاندىرۋ مارتەبەسىنە قاراماستان بازالىق كومەكتىڭ قولجەتىمدىلىگىنە كەپىلدىك بەرۋ. 2026-جىلدان باستاپ نەگىزگى مىندەتتەمەلەردى تەگىن مەديتسينالىق كومەكتىڭ كولەمى پاكەتىنەن ساقتاندىرۋ جۇيەسىنە اۋىستىرىپ، كەزەڭ كەزەڭىمەن بىرىكتىرۋ قاجەت»، - دەدى ۆەدومستۆو باسشىسى.
تەگىن مەديتسينالىق كومەكتىڭ كولەمى پاكەتىندە الەۋمەتتىك ماڭىزى بار اۋرۋلارعا كۇدىك جاعدايلارداعى كومەك 2 دەن 8 گە دەيىن ۇلعايتىلىپ، ساقتاندىرۋ مارتەبەسىنە قاراماستان اقىسىز كورسەتىلەدى. ودان بولەك، وسى جىلدان باستاپ ساقتاندىرىلماعان ازاماتتار ونكوسكرينينگتەن تەگىن وتۋگە مۇمكىندىگى بار.
«بيىلدان باستاپ سكرينينگتىڭ جاڭا 2 ءتۇرى ەنگىزىلدى: جۇكتىلىككە دايىندىق جانە 50 جاستان اسقان ەرلەردە ينسۋلت پەن ينفاركتىڭ الدىن الۋ ماقساتىندا»، - دەدى مينيستر.