قازاقستاندا 4,2 مىڭ مەدبيكەنىڭ ورنى بوس تۇر، مامان تاپشى

استانا. قازاقپارات – 12-مامىردا بۇكىل الەمدە حالىقارالىق مەدبيكەلەر كۇنى اتالىپ وتەدى. بيىل ەلىمىزدە 147 مىڭعا جۋىق مەدبيكە كاسىبي مەرەكەسىن تويلاپ جاتىر. قوعامدىق ساياسات ينستيتۋتى وسى سالاداعى مامانداردىڭ جۇمىسىنا شولۋ جاسادى.

ەلىمىزدە ورتا مەديتسينالىق پەرسونالدىڭ سانى جىل سايىن ارتىپ كەلە جاتقانىنا قاراماستان كادر تاپشىلىعى ءالى دە ساقتالىپ وتىر.

بۇگىندە 4,2 مىڭعا جۋىق ورتا بۋىن مامانى جەتىسپەيدى.

سونىمەن قاتار، مەيىربيكە ماماندارمەن قامتاماسىز ەتۋ تومەن دەڭگەيدە قالىپ وتىر: 10 مىڭ ادامعا - 74,7، اكۋشەريادا 10 مىڭ ادامعا - 5.

مىسالى د د ۇ سوڭعى دەرەگىنشە (2020) ەۋروپا ەلدەرىندە مەيىربيكە جانە اكۋشەر مامانداردىڭ ادام سانىنا شاققانداعى كولەمى مىناداي:

فينليانديا - 10 مىڭ ادامعا 223,3؛

شۆەتسيا - 10 مىڭ ادامعا 215,9؛

بەلگيا - 10 مىڭ ادامعا 201,3؛

شۆەيتساريا - 10 مىڭ ادامعا 187,1؛

نورۆەگيا - 10 مىڭ ادامعا 185,1.

ايتا كەتۋ كەرەك، بۇكىل الەمدە دەنساۋلىق ساقتاۋ جۇيەسىندە مەدبيكەنىڭ ءرولى ارتىپ كەلەدى. جالپى، مەدبيكە ءىسى سالاسىندا قىزىق تەندەنتسيالار بايقالادى.

ماسەلەن، دەنساۋلىق ساقتاۋداعى جۇمىس كۇشىنىڭ يننوۆاتسياسى رەتىندە مەدبيكەلىك فۋنكتسيالاردى كەڭەيتۋ.

باستاپقى مەديتسينالىق- سانيتارلىق كومەك كورسەتۋ مەكەمەلەرىندەگى كادر تاپشىلىعىن، سونداي-اق جالپى تاجىريبە دارىگەرلەرىنىڭ جوعارى جۇكتەمەسىن ەسكەرە وتىرىپ، كوپتەگەن ەلدەر مەديتسينا مىندەتتەرىنىڭ ءبىر بولىگىن مەدبيكەگە بەرۋ جونىندە شەشىم قابىلداعان (شۆەيتساريا، ۇلى بريتانيا، فينليانديا، يرلانديا، پولشا جانە باسقا).

مەيىربيكەلىك قىزمەتتىڭ جاڭا مودەلىن ازىرلەۋ جانە ەنگىزۋ جوباسى اياسىندا (2017 -جىلدان باستاپ) قازاقستاندا ءبىرقاتار دارىگەرلىك فۋنكتسيالاردى (پاتروناج، ۆاكسيناتسيا، سكرينينگ جانە ءبىرقاتار دياگنوستيكالىق جانە ەمدىك پروتسەدۋرالار) ءوز موينىنا العان وزىق تاجىريبەلى مەدبيكە لاۋازىمى ەنگىزىلدى.

تاعى ءبىر ءۇردىس - جوعارى ءبىلىمى بار مەدبيكەلەر ۇلەسىن ارتتىرۋ. ددۇ ۇسىنىمى بويىنشا جوعارى ءبىلىمى بار مەدبيكەلەردىڭ ۇلەسى كەمىندە %10 بولۋى كەرەك.

2022 -جىلعى جاعداي بويىنشا امەريكا قۇراما شتاتتارىنداعى مەدبيكەلەردىڭ 71,7 پايىزىنىڭ باكالاۆر نەمەسە ودان جوعارى دارەجەسى بار.

قازاقستاندا مەدبيكە ماماندارىن دايارلاۋدىڭ كوپ دەڭگەيلى جۇيەسى ەنگىزىلگەن.

سونىمەن قاتار، جۇمىس ىستەيتىن مەدبيكەلەر ءۇشىن ينتەگراتسيالانعان اكادەميالىق جانە قولدانبالى باكالاۆريات باعدارلامالارى ازىرلەندى.

وسىعان وراي ەلىمىزدەگى 37 مەديتسينالىق كوللەدج جوعارى كوللەدج مارتەبەسىن الىپ، قولدانبالى باكالاۆرلاردى دايارلايدى.

بۇگىندە بىلىكتى مەيىربيكە ماماندارىنا سۇرانىس كۇننەن كۇنگە ارتىپ وتىر.

دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، 2020 -جىلى مەدبيكەلەردىڭ جاھاندىق جۇمىس كۇشىنىڭ تاپشىلىعى - 5,9 ميلليون ادام بولعان.

مەدبيكە جەتىسپەۋشىلىگى افريكا، وڭتۇستىك- شىعىس ازيا جانە لاتىن امەريكاسىنىڭ ءبىرقاتار ەلدەرىندە وتە وتكىر تۇر.

ەڭبەك رەسۋرستارىن دامىتۋ ورتالىعىنىڭ مالىمەتىنشە، الداعى 5 جىلدا مەدبيكە كادرلارىنا سۇرانىس 39 مىڭ ادامعا جەتەدى.

ەڭبەك جانە حالىقتى الەۋمەتتىك قورعاۋ مينيسترلىگى ەڭ ۇلكەن سۇرانىسقا يە توپ-5 بوس جۇمىس ورىندارىنىڭ قاتارىنا مەدبيكەنى كىرگىزەدى (1,2 مىڭ بوس ورىن).

اۆتور

جانات قاپالبايەۆا