قازاقستاندا 3,8 تريلليون تەكشە مەتر دالەلدەنگەن گاز قورى بار

استانا. KAZINFORM - ونەركاسىپ جانە قۇرىلىس مينيسترلىگى گەولوگيا كوميتەتىنىڭ مالىمەتىنشە، ەلىمىزدە گازدىڭ دالەلدەنگەن قورى - 3,8 تريلليون تەكشە مەتر.

ونىڭ ىشىندە ىلەسپە (ەرىگەن) گاز - 2,2 تريلليون تەكشە مەتر، ال تابيعي (ەركىن) گاز - 1,6 تريلليون تەكشە مەتر.

الايدا British Petroleum قازاقستاندا تابيعي گازدىڭ دالەلدەنگەن قورىنىڭ كولەمى 2,3 تريلليون تەكشە مەتر ەكەنىن مالىمدەپ وتىر. بۇل - الەمدە 15-ورىندا تۇرعان كورسەتكىش.

وسىلايشا قازاقستانعا تابيعي گازدىڭ بۇكىلالەمدىك كولەمىنىڭ %1,2 تيەسىلى.

سالىستىرساق، گاز قورى بويىنشا كوشباسشى ەلدەر - رەسەي (37,4 تريلليون تەكشە مەتر)، يران (32,1 تريلليون تەكشە مەتر) جانە قاتار (24,7 تريلليون تەكشە مەتر).

ءوز كەزەگىندە ەنەرگەتيكا مينيسترلىگى قوس مالىمەتتەگى ايتارلىقتاي ايىرماشىلىقتى ءتۇسىندىردى.

ۆەدومستۆو جاقىندا گازدىڭ قورىن British Petroleum سياقتى ەسەپتەۋ ادىستەمەسىنە كوشىرۋدى جوسپارلاپ وتىرعانىن حابارلادى.

«كورسەتكىشتەردىڭ مۇنداي سايكەسسىزدىگى قازاقستاننىڭ گاز قورىنداعى ىلەسپە مۇناي گازىنىڭ جوعارى ۇلەسىنەن دە، رەسپۋبليكا جاقىن ارادا حالىقارالىق ستاندارتتارعا كوشۋدى جوسپارلاپ وتىرعان قوردى ەسەپتەۋ ادىستەمەسىندەگى ايىرماشىلىقتان دا تۋىندادى»، - دەلىنگەن ەنەرگەتيكا مينيسترلىگىنىڭ حابارلاماسىندا.