قازاقستاندا 2040 -جىلعا قاراي تالاپكەرلەر سانى ەكى ەسە وسەدى
استانا. KAZINFORM - قازاقستاندا كادرلاردى دايارلاۋ ماسەلەسى بويىنشا اۋديت جۇرگىزىلدى. بۇل تۋرالى ءماجىلىس ءتوراعاسىنىڭ ورىنباسارى دانيا ەسپايەۆا ءمالىم ەتتى.
- جوعارى ءبىلىم بەرۋ جۇيەسىنە دەموگرافيالىق جۇكتەمەنىڭ ارتىپ كەلەدى. تۋۋ كورسەتكىشىنىڭ تۇراقتى ءوسۋى جونىندەگى بولجامدارعا سايكەس، 2040 -جىلعا قاراي تالاپكەرلەر سانى ەكى ەسەگە ءوسىپ، ءتورت ءجۇز قىرىق مىڭنان اسادى، - دەدى دانيا ەسپايەۆا پارلامەنت ماجىلىسىندە جوعارى ءبىلىمدى كادرلاردى دايارلاۋ تاقىرىبىنا ارنالعان ۇكىمەت ساعاتىندا.
سونىمەن قاتار ول وقۋ جوسپارلارىن جاڭعىرتۋ جەتكىلىكسىز ەكەنىن ايتىپ، وقىتۋشىلاردىڭ وقىتۋ تاسىلدەرىن قايتا قاراستىرىپ، زاماناۋي تەحنولوگيالار مەن ادىستەردى مەڭگەرۋى قاجەت ەكەنىن ءسوز ەتتى.
- ولاردىڭ ويلاۋ جۇيەسىنىڭ ترانسفورماتسياسى - جوعارى ءبىلىم بەرۋدى جاڭارتۋدىڭ نەگىزگى شارتى. وسىعان بايلانىستى پروفەسسورلىق-وقىتۋشىلىق قۇرامدى جاساندى ينتەللەكتىنى ءتيىمدى پايدالانۋعا دايىنداۋ باستى مىندەتكە اينالىپ وتىر، - دەدى دەپۋتات.
سونىمەن قاتار ول جاستاردىڭ ينجەنەرلىك ماماندىقتاردى تاڭداۋعا دەگەن موتيۆاتسياسى تومەن ەكەنىن اتاپ ءوتتى. تالاپكەرلەردىڭ ءبىر بولىگى گرانت الۋ ءۇشىن عانا ءتۇسىپ، بولاشاعىن ينجەنەرلىك ماماندىقپەن بايلانىستىرمايدى. بۇل جاعدايدا بولىنەتىن رەسۋرستار سۇرانىسقا يە ينجەنەرلىك كادرلاردىڭ قالىپتاسۋىنا اكەلمەيدى، ال گرانتتاردى ءبولۋ جۇيەسىنىڭ ءوزى ەكونوميكانىڭ باسىم سالالارىندا تۇلەكتەردى سانالى تۇردە تاڭداۋدى جانە بەكىتۋدى ىنتالاندىرمايدى.
- كادرلاردى دايارلاۋ ماسەلەسى بويىنشا اۋديت جۇرگىزىلدى، ول وسى سالاداعى ءبىرقاتار وتكىر جۇيەلىك پروبلەمانى انىقتادى، ولار تۋرالى بۇگىن سىزدەرگە جوعارى اۋديت پالاتاسىنىڭ مۇشەسى حابارلايدى، - دەدى ءماجىلىس ءتوراعاسىنىڭ ورىنباسارى.
بۇدان بۇرىن حابارلانعانداي، 2035 -جىلعا قاراي قازاقستاندا 562 كاسىپ نەمەسە ەڭبەك
نارىعىنىڭ %44 ى (شامامەن 4 ميلليون ادام) جاساندى ينتەللەكتىنىڭ ىقپالىمەن وزگەرۋى مۇمكىن.
