قازاقستاندا 2024-جىلى قاي ايدا ەڭبەك دەمالىسىنا شىققان ءتيىمدى؟

كەز كەلگەن جۇمىس ىستەيتىن ادام ەڭبەك دەمالىسىن اسىعا كۇتەدى. ورتاشا ستاتيستيكالىق جۇمىسشى ايىنا ناقتى بەكىتىلگەن مولشەردەگى جالاقى الادى.

ەڭبەك دەمالىسىنا بەرىلەتىن اقشا ءبىر ايلىق كىرىسىڭىزدەن كوپ نەمەسە از ءتۇسۋى مۇمكىن. ەڭبەك دەمالىسىنا ءتيىمدى شىعۋ ءۇشىن نەنى ءبىلۋ كەرەك؟

ەڭبەك دەمالىسى جۇمىس كۇندەرىمەن ەمەس، كۇنتىزبەلىك كۇندەرمەن ەسەپتەلەدى: ەڭبەك دەمالىسىنداعى دەمالىس كۇندەر سونىڭ ىشىنە كىرىپ كەتەدى، ءبىراق دەمالىس كۇندەرگە اقشا تولەنبەيدى. الايدا رەسمي مەرەكە كۇندەر سانالمايدى دا، ەڭبەك دەمالىسى سوزىلادى.

جالپى جىل سايىنعى تولەنەتىن ەڭبەك دەمالىسى ق ر- نىڭ ەڭبەك كودەكسىنە سايكەس 24 كۇنتىزبەلىك كۇندى قۇرايدى. ەڭبەك دەمالىسىنا بەرىلەتىن 24 كۇندى ءبولىپ الۋعا بولادى، الايدا ونىڭ ءبىر بولىگى 14 كۇنتىزبەلىك كۇننەن از بولماۋى ءتيىس.

ۇزاعىراق دەمالۋ ءۇشىن ەڭبەك دەمالىسىنا قاي كەزدە شىعۋ كەرەك؟

كوپشىلىك ادام ەڭبەك دەمالىسىنا شىعار كەزدە ونىڭ بارىنشا ۇزاق بولعانىن جانە تاعى دا قولدانىلماعان كۇندەر قالعانىن قالايدى. ۇزاعىراق دەمالۋ ءۇشىن ەڭبەك دەمالىسىن مەرەكەسى كوپ ايدا الۋ كەرەك. قازاقستاندا ەڭ كوپ مەرەكە بولاتىن ايلارعا ناۋرىز (5 مەرەكەلىك كۇن)، قاڭتار (3 مەرەكەلىك كۇن) جانە مامىر (3 مەرەكەلىك كۇن) جاتادى.

الايدا بۇل ايلاردا ەڭبەك دەمالىسىنا ارنالعان اقشا از تۇسەدى. ەگەر ءسىز ءۇشىن ەڭبەك دەمالىسىنىڭ كۇندەرى ماڭىزدى بولسا جانە بارىنشا ۇزاعىراق دەمالعىڭىز كەلسە، ناۋرىز، مامىر، جەلتوقساننىڭ اياعى مەن قاڭتاردىڭ باسىنا جوسپارلاعان ءجون. مەرەكەلىك كۇندەر ەڭبەك دەمالىسىن تولىقتىراتىنداي بولۋى كەرەك. ەگەر ەڭبەك دەمالىسىندا مەرەكەلىك كۇندەر بولسا، ەڭبەك دەمالىسى سول كۇندەرگە ۇزارتىلاتىنىن بىلە ءجۇرىڭىز.

ەڭبەك دەمالىسىنا قالاي ءتيىمدى شىعۋعا بولادى؟

ەگەر دەمالعىڭىز كەلسە جانە قارجىلىق جاعىنان قينالىپ قالعىڭىز كەلمەسە، ەڭبەك دەمالىسىن جۇمىس كۇندەرى كوپ، ال دەمالىس كۇندەرى از ايدا الۋ كەرەك. 2024-جىلى قازاقستاندا ءساۋىر (22 كۇن)، قازان (22 كۇن)، قىركۇيەك (21 كۇن) جانە قاراشا (21 كۇن) ايلارىندا جۇمىس كۇندەرى كوپ.

سونداي-اق ەگەر قانداي دا ءبىر جوبانى اياقتاعانىڭىز ءۇشىن جاقىن ارادا سىيلىقاقى تۇسەتىن بولسا، ەڭبەك دەمالىسىنا سىيلىقاقى تۇسكەننەن كەيىن شىققان دۇرىس. سەبەبى ونى ەسەپ كەزىندە ەسكەرەدى دە، ەڭبەك دەمالىسىنا ارنالعان اقشا كوبىرەك بولادى.

ال ەگەر جاقىندا جالاقىڭىزدى كوتەرگەن بولسا، بىردەن ەڭبەك دەمالىسىنا شىعۋ ءتيىمسىز. سەبەبى ەڭبەك دەمالىسىڭىزدى سوڭعى ءبىر جىلداعى جالاقىڭىزدى (ياعني، بۇرىنعى جالاقىڭىزدى) ەسەپكە الا وتىرىپ ەسەپتەيدى.

قورىتىندىلاساق، ەڭبەك دەمالىسىنا شىعاتىن ايدا جۇمىس كۇندەرى قانشالىقتى كوپ بولسا، سول ايعا ارنالعان جالپى كىرىس جوعارى بولادى، ال ەگەر ول ايدا مەرەكەلىك كۇندەر كوپ بولسا، ەڭبەك دەمالىسى ۇزاعىراق بولادى، ءبىراق كىرىسى از بولادى.

massaget.kz