قازاقستاندا 100 جاستان اسقان قانشا قاريا بار
استانا. KAZINFORM - قازاقستاندا 100 جانە ودان دا ۇلكەنىرەك جاستاعى 448 ازامات بار. ەڭ جاسى ۇلكەن قازاقستاندىق ۇلىتاۋ وبلىسىندا تۇرادى، ول 115 جاسقا تولعان تۋعان كۇنىن اتاپ ءوتتى، دەپ حابارلايدى ەڭبەكمينى.
ۆەدومستۆو مالىمەتىنشە، ءجۇز جاسقا تولعانداردىڭ ەڭ كوپ سانى ەلىمىزدىڭ ەڭ ءىرى قالاسى الماتىدا تۇرادى، وندا 100 جانە ودان جوعارى جاستاعى 58 ادام بار.
- ۇزاق ءومىر سۇرۋشىلەر سانى بويىنشا ەكىنشى ورىندا - تۇركىستان وبلىسى. وندا 100 جاستان اسقان 53 ادام تۇرادى. ال ءۇشىنشى ورىندا - الماتى وبلىسى، وندا 100 جاساعان 37 ادام بار، - دەلىنگەن حابارلامادا.
ەڭ قارت قازاقستاندىقتاردىڭ ۇشتىگىنە ۇلىتاۋ وبلىسىنىڭ تۇرعىنى - 115 جاس، پاۆلودار وبلىسى - 113 جاس، جامبىل وبلىسى - 110 جاس كىردى.
ەستەرىڭىزگە سالا كەتەيىك، جىل سايىن بۇكىل الەمدە، ونىڭ ىشىندە قازاقستاندا دا 1-قازاندا حالىقارالىق قارتتار كۇنى اتاپ وتىلەدى. بۇل مەرەكەنى 1990 -جىلى 14-جەلتوقساندا بىرىككەن ۇلتتار ۇيىمىنىڭ باس اسسامبلەياسى 45-سەسسيادا جاريالادى.
ونى وتكىزۋدىڭ باستى ماقساتى - ەگدە جاستاعى ادامداردىڭ مەملەكەت پەن قوعام الدىنداعى ەڭبەگىن قۇرمەتتەۋ جانە تانۋ، سونداي-اق ولاردىڭ پروبلەمالارى مەن قاجەتتىلىكتەرىنە، ءومىر ءسۇرۋ ساپاسىن ارتتىرۋ قاجەتتىلىگىنە نازار اۋدارۋ، ولارعا جالپىعا بىردەي قامقورلىق كورسەتۋ.
