قازاقستاندا 10 مىڭعا جۋىق ادام بانكروت دەپ تانىلدى
قازاقستاندا بانكروتتىق پروتسەسس جەڭىلدەتىلەدى. بۇل تۋرالى قارجى ۆيتسە- ءمينيسترى ەرجان ءبىرجانوۆ ايتتى، دەپ حابارلايدى Kazinform.
«سوڭعى دەرەكتەرگە سايكەس، 80 مىڭنان استام ادامنىڭ ءوتىنىش قارالىپ، قازىر 10 مىڭعا جۋىق ادام بانكروت دەپ تانىلىپ جاتىر. بۇل باعىتتاعى جۇمىستاردى ناۋرىز ايىندا باستاعانىمىزدى ەسكەرسەك، سودان بەرى التى اي ۋاقىت قۇجاتتاردى تەكسەرۋ راسىمدەرىنە ارنالدى. وسى رەتتە، ەكى رەت مونيتورينگ جاسالدى. سوندىقتان العاشقى بانكروت مارتەبەسىن العاندار قىركۇيەك ايىنان باستالدى»، - دەدى ە. ءبىرجانوۆ ءماجىلىستىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، قىركۇيەكتەن بەرى 10 جۋىق ادام بانكروت رەتىندە تانىلدى.
«ارى قاراي بۇل باعىتتاعى جۇمىستى جالعاستىرامىز. قوسىمشا زاڭنامالىق وزگەرىستەر ەنگىزىلەدى. اتاپ ايتقاندا، بانكروتتىق پروتسەستى جەڭىلدەتۋدى قاراستىردىق. وسى ورايدا بانكتەن الاتىن قۇجاتتاردىڭ سانىن ازايتۋ، قوسىمشا قۇجاتتارعا تىيىم سالۋ ەسكەرىلگەن. ماسەلەن، ادامدار ءوتىنىش بەرىلگەننەن كەيىن، ءبىز باسقا مەملەكەتتىك ورگاندارمەن جانە بانكتەرمەن اقپارات الماسۋ ارقىلى بانكروتتىق ءراسىمىن قارايمىز. ياعني ءقازىر بايقالعان كەدەرگىلەردى جويۋعا نازار اۋدارىپ وتىرمىز»، - دەدى ۆيتسە- مينيستر.
ونىڭ سوزىنە قاراعاندا، ءتيىستى وزگەرىستەردى زاڭ جوباسى اياسىندا ءماجىلىس دەپۋتاتتارى قاراستىرىپ جاتىر.
«كەلەسى جىلدىڭ باسىندا زاڭناماعا وزگەرىستەر ەنگىزىلىپ، مۇمكىندىكتەر كەڭەيتىلەدى»، - دەدى ەرجان ءبىرجانوۆ.
ايتا كەتەيىك، بيىل قازان ايىنىڭ اياعىندا 6 مىڭنان استام قازاقستاندىق بانكروت دەپ تانىلدى.
بانكروت دەپ تانىلعانداردىڭ اراسىندا ەر ازاماتتاردىڭ سانى 58 پايىز بولدى.
