قازاقستاندا 10- اقپاننان باستاپ كيىك اتۋعا قايتادان تىيىم سالىندى
استانا. KAZINFORM - ەلىمىزدىڭ اۋماعىندا كيىك اۋلاۋ ۋاقىتشا توقتادى. بۇل تۋرالى پارلامەنت ماجىلىسىندە ورمان قورعاۋ تاقىرىبىنا ارنالعان ۇكىمەت ساعاتىنان كەيىن تىلشىلەرگە ق ر ەكولوگيا جانە تابيعي رەسۋرستار ءمينيسترى ەرلان نىسانبايەۆ ايتتى.
«وتاندىق عالىمدارمەن جانە حالىقارالىق ساراپشىلارمەن كەڭەسىپ، پىكىرتالاس جۇرگىزگەننەن كەيىن كيىك اتۋ توقتاتىلدى. سونىمەن قاتار، قازىر قىس كەزىندە دالادا ءجۇرۋ قيىندادى. سوندىقتان 10- اقپاننان باستاپ كيىكتەردىڭ سانىن رەتتەۋ پروتسەسىن توقتاتتىق»، - دەدى ە. نىسانبايەۆ.
ونىڭ ايتۋىنشا، كيىك اۋلاۋ جۇمىستارى كەلەسى جىلى جالعاسادى.
«بىلتىرعى تاجىريبەنى ەسكەرە وتىرىپ، بيىل ەگجەي-تەگجەيلى ەسەپ جۇرگىزىلەدى. الدىن الا ەسەپتەۋ بويىنشا شامامەن 40 پايىز ءوسىم بولدى. جالپى، بىلتىرعى ءوسىمدى ەسەپكە العاندا تولدەيتىن ۋاقىتتا شامامەن 2,5-2,6 ميلليون باس بولادى. ءتىپتى پەسسيميستىك جاعدايدا دا بيىل ءوسىم بايقالادى»، - دەدى مينيستر.
