قازاقستانعا سىرتتان جۇمىرتقا اكەلۋگە التى ايعا تىيىم سالىندى

استانا. KAZINFORM - جۇمىرتقا يمپورتىنا ۋاقىتشا تىيىم كوكتەمگى-جازعى كەزەڭدە وتاندىق تاۋار وندىرۋشىلەردى قولداۋ ماقساتىندا ەنگىزىلىپ وتىر. بۇل تۋرالى اۋىل شارۋاشىلىعى مينيسترلىگى حابارلايدى.

«قازاقستان رەسپۋبليكاسىنىڭ اۋماعىنا تاۋىق جۇمىرتقالارىن اكەلۋگە تىيىم سالۋدى ەنگىزۋ تۋرالى» اۋىل شارۋاشىلىعى ءمينيسترىنىڭ 2025 -جىلعى 4-ساۋىردەگى № 101 بۇيرىعىمەن قازاقستان رەسپۋبليكاسىنىڭ اۋماعىنا قازاقستان رەسپۋبليكاسىنىڭ اۋماعىنا بارلىق كولىك تۇرلەرىمەن ءۇشىنشى ەلدەردەن جانە ەۋرازيالىق ەكونوميكالىق وداق ەلدەرىنەن تاۋىق جۇمىرتقالارىن (س ە ق ت ن: 040721) اكەلۋگە التى اي مەرزىمگە تىيىم سالىندى.

ايتا كەتۋ كەرەك، تىيىم قازاقستان رەسپۋبليكاسىنىڭ اۋماعى ارقىلى تاۋىق جۇمىرتقالارىنىڭ ترانزيتىن، سونداي-اق ولاردىڭ ەۋرازيالىق ەكونوميكالىق وداققا مۇشە ءبىر مەملەكەتتىڭ اۋماعىنان ەۋرازيالىق ەكونوميكالىق وداققا مۇشە ەكىنشى مەملەكەتتىڭ اۋماعىنا قازاقستان رەسپۋبليكاسىنىڭ اۋماعى ارقىلى وتۋىنە قاتىستى قولدانىلمايدى.

- اتالعان كەزەڭدە جۇمىرتقاعا سۇرانىستىڭ تومەندەۋى بايقالادى، نارىقتىڭ قاجەتتىلىگى ونەركاسىپتىك ءوندىرىس ارقاسىندا جانە ءۇي شارۋاشىلىعى ونىمدەرىنىڭ نارىقتا بەلسەندى بولۋىمەن تولىعىمەن جابىلادى. بۇل فاكتور قۇس فابريكالارىنىڭ قىزمەتىنە تەرىس اسەر ەتەدى، جۇمىرتقا باعاسى تومەندەيدى. باعانىڭ وزىندىك قۇننان تومەن ءتۇسۋى كاسىپورىنداردىڭ رەنتابەلدىلىگىنە تەرىس اسەر ەتەدى، - دەلىنگەن حابارلامادا.

سونداي-اق ۆەدومستۆو سىرتتان جۇمىرتقا اكەلۋگە تىيىمنىڭ تاعى ءبىر سەبەبىن وسى كەزەڭدە جۇمىرتقانى ساقتاۋ مەرزىمى قىسقاراتىنىمەن بايلانىستىرىپ وتىر.

- تەحنولوگيالىق ەرەكشەلىكتەرگە بايلانىستى جۇمىرتقا ءوندىرۋ كولەمى ازايمايدى، بۇل قويمالاردا تاۋاردىڭ ارتىق جينالۋىنا اكەلەدى. وسىعان بايلانىستى، وتاندىق تاۋار وندىرۋشىلەردى قولداۋ جانە ىشكى نارىقتى قورعاۋ ماقساتىندا سىرتقى ساۋدا ساياساتى جانە حالىقارالىق ەكونوميكالىق ۇيىمدارعا قاتىسۋ ماسەلەلەرى جونىندەگى ۆەدومستۆوارالىق كوميسسيادا كوكتەمگى-جازعى كەزەڭگە بارلىق كولىك تۇرلەرىمەن تاۋىق جۇمىرتقالارىن قازاقستان رەسپۋبليكاسىنىڭ اۋماعىنا اكەلۋگە ۋاقىتشا شەكتەۋ شارالارىن بەلگىلەۋ ماقۇلداندى، - دەيدى مينيسترلىكتەن.

بۇيرىق بۇگىن كۇشىنە ەندى.

ەسكە سالا كەتسەك، بيىل اقپاندا ساۋدا جانە ينتەگراتسيا مينيسترلىگى، اۋىل شارۋاشىلىعى مينيسترلىگى، قۇس وسىرۋشىلەر وداعى، جۇمىرتقا وندىرۋشىلەر سالالىق قاۋىمداستىعى جانە ساۋدا جەلىلەرى وداعى الەۋمەتتىك ماڭىزدى ازىق-تۇلىك تاۋارلارىنىڭ باعاسىن تۇراقتاندىرۋ شارالارىن ىسكە اسىرۋ بويىنشا ىنتىماقتاستىق مەموراندۋمىنا قول قويدى.