قازاقستانعا رەسەيلىك قانتتى اۆتوكولىكپەن اكەلۋگە تىيىم سالىنۋى مۇمكىن
استانا. KAZINFORM - اۋىل شارۋاشىلىعى مينيسترلىگى قازاقستان اۋماعىنا رەسەيلىك قانتتى اۆتوكولىكپەن تاسىمالداۋعا تىيىم سالۋ ماسەلەسىن قاراستىرماق. بۇل تۋرالى اتالعان ۆەدومستۆونىڭ ۆيتسە-ءمينيسترى ەربول تاسجۇرەكوۆ ايتتى.
ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا تىلشىلەر مينيسترلىك وكىلىنەن رەسەيلىك قانتتى اۆتوكولىكپەن ەلىمىزگە اكەلۋگە تىيىم سالۋ تۋرالى مامانداردىڭ ۇسىنىسىنا قاتىستى سۇراق قويدى.
«جالپى، ەلىمىزدە ءتورت قانت زاۋىتى بار، ونىڭ بىرەۋى قانت قۇراعىن وڭدەۋ ارقىلى ءونىم ءوندىرىپ جاتىر. قانت ونەركاسىبىن دامىتۋ باعىتىندا جۇمىس ىستەپ جاتىرمىز، ءتيىستى كەشەندى جوسپار قابىلداندى. ءبىراق، قازىر رەسەيلىك قانتتىڭ باعاسى ءبىرقاتار سەبەپتەرگە بايلانىستى ءبىزدىڭ ەلدە وندىرىلەتىن قانتقا قاراعاندا ارزانىراق. سوندىقتان يمپورتتالاتىن قانت الدەقايدا ارزان ەكەنىن ەسكەرە وتىرىپ، وتاندىق قىزىلشا شيكىزاتىنان قانت وندىرەتىن زاۋىتتارىمىزعا وبەكتيۆتى جانە ءادىل باعا بەرۋ ءۇشىن بۇل ماسەلەنى قاراستىرىپ جاتىرمىز»، - دەدى ە. تاسجۇرەكوۆ.
ول بۇل ماسەلە ۆەدومستۆوارالىق كوميسسيا وتىرىسىندا قارالاتىنىن ايتتى.
«قازىر بۇل ماسەلەمەن اينالىسىپ جاتىرمىز، سوندىقتان ۆەدومستۆوارالىق كوميسسياعا ءتيىستى اقپارات دايىندالىپ، تالقىلاۋعا ۇسىنىلادى. ەگەر بۇل ماسەلەنى اتالعان كوميسسيانىڭ بارلىق مۇشەسى قولداسا، وندا ءتيىستى شەشىم قابىلدانادى»، - دەدى ۆيتسە-مينيستر.
ەسكە سالساق، جاقىندا اۋىل شارۋاشىلىعى مينيسترلىگى قازاقستان اۋماعىنا ءبيداي اكەلۋگە تىيىم سالىنعانىن مالىمدەدى.
