قازاقستانعا قايتا كەلگەن بەلگيالىق جانىبەك جۇماعۇلوۆ استاناداعى بالالار ۇيىنە باردى
استانا. KAZINFORM - بەلگيالىق وتباسى اسىراپ العان قازاقستاندىق جانىبەك جۇماعۇلوۆ (دجاني) قازاقستانعا تۋعان اناسىن ىزدەپ قايتا كەلدى.
«مەنىڭ ءومىرىم قازاقستاننىڭ ارقالىق قالاسىنداعى بالالار ۇيىنەن باستالدى. سوڭعى ايلاردا مەن بۇرىن بالالار ۇيىندە جۇمىس ىستەگەن كەيبىر تاربيەشىمەن تانىسۋعا مۇمكىندىك الدىم. وسى مەرەكەدە العىسىمدى ءبىلدىرۋ ءۇشىن، استاناداعى @kindervillage-دەگى بالالاردى قۋانتىپ، كوپتەگەن سىيلىق، ويىنشىقپەن بارۋعا ماعان رۇقسات ەتىلدى»، - دەپ جازدى جانىبەك Instagram-داعى پاراقشاسىندا.
سونداي-اق قازاقستانعا تۋعان اناسىن ىزدەپ كەلگەن وتانداسىمىز العىس ايتۋ كۇنىنە وراي بالالارعا سىيلىق جاساپ، قۋانتقىسى كەلگەنىن تىلگە تيەك ەتتى.
«كەيبىر بالالاردىڭ اتا-اناسى جوق جانە ولار كامەلەت جاسقا تولعانعا دەيىن بالالار ۇيىندە ءتۇرلى جاستاعى بالالارمەن بىرگە تۇرادى ەكەن. ولار سىيلىقتاردى الىپ، اشىپ، كورىپ جاتقاندا، جۇزىندەرىندەگى قۋانىشتى بايقاپ، ءوزىم دە تولقىپ كەتتىم. وسى ەرەكشە مەرەكەدە مەنىڭ تىلەگىم - ءار بالانىڭ جاقسى، جىلى ۇيدە ءومىر سۇرگەنىن قالايمىن. ءار بالانىڭ ادەمى اپكەسى مەن اعاسى بولىپ، جالعىزسىراماۋىن تىلەيمىن. ءار ادامنىڭ الدىندا جارقىن بولاشاق بولسا ەكەن»، - دەيدى ول.
ايتا كەتسەك، وسىدان ەكى كۇن بۇرىن جانىبەك جۇماعۇلوۆ (دجاني) جەكە پاراقشاسىندا قازاقستانعا قايتا كەلگەنىن جازعان.
«وسى ارالىقتا انامنىڭ ىزدەگەنى تۋرالى سۇراقتارعا بايلانىستى پوليتسياعا باردىم. ولار وتە ۇلكەن تەرگەۋدى باستادى، ول تۋرالى كەيىنىرەك ايتامىن»، - دەلىنگەن جەلىدەگى جازبادا.
ەسكە سالا كەتەيىك، بۇعان دەيىن بەلگيا ازاماتى اسىراپ العان 22 جاستاعى جانىبەك جۇماعۇلوۆ (دجاني) قازاقستاندا تۋعان اناسىن ىزدەپ كەلگەنى تۋرالى جازعان ەدىك. وتانداسىمىزدىڭ اناسىن ىزدەستىرۋ جۇمىستارىنىڭ بارىسىمەن جانىبەك جۇماعۇلوۆتىڭ قازاقستانداعى رەسمي وكىلى قىمبات دوسجان ايتىپ بەردى.
