قازاقستانعا كەلگەن تۋريستەرگە تەگىن SIM كارتا بەرۋ ۇسىنىلدى

استانا. KAZINFORM - قازاقستانعا كەلگەن تۋريستەردىڭ ۆيزا راسىمدەۋىن جەڭىلدەتىپ، تەگىن SIM كارتا بەرۋ ۇسىنىلدى. بۇل تۋرالى تۋريزم جانە سپورت ءمينيسترى ەربول مىرزابوسىنوۆ ۇكىمەتتىڭ بۇگىنگى وتىرىسىندا باياندادى.

− تۋريستىڭ العاشقى اسەرى اۋەجاي مەن شەكارادان باستالادى. ونداعى قىزمەت ساپاسى - ەل تۋرالى كوزقاراستى قالىپتاستىراتىن العاشقى قادام. كەيبىر تۋريستەر ءۇشىن ۆيزا راسىمدەۋ ۇزاققا سوزىلىپ، بىرنەشە ساعاتقا دەيىن جالعاسىپ جاتادى. مۇنداي جاعدايلاردى بولدىرماۋ ءۇشىن شەكارا مەن اۋەجاي قىزمەتكەرلەرىنە ارنالعان وقىتۋ باعدارلامالارىن وتكىزۋدى ۇسىنامىز. بۇل ماقساتتا ءبىز حالىقارالىق تۋريزم ۋنيۆەرسيتەتى مەن Kazakh Tourism ۇلتتىق كومپانياسىنىڭ الەۋەتىن پايدالانۋعا دايىنبىز، − ە. مىرزابوسىنوۆ.

سالا ءمينيسترى وتكىزۋ پۋنكتتەرىندە Q-gate جۇيەسىن كەڭىنەن ەنگىزۋ تۋريستەرگە ىڭعايلى بولاتىنىن اتاپ ءوتتى.

− تاعى ءبىر ۇسىنىس - تۋريستەرگە كەلگەن بويدا تەگىن SIM كارتا بەرۋ. بۇل ولارعا العاشقى ساتتەن باستاپ ينتەرنەت پەن بايلانىسقا قول جەتكىزۋگە كومەكتەسەدى، − دەيدى تۋريزم ءمينيسترى.

ايتا كەتەيىك، وتكەن جىلى ەلىمىزگە 15,3 ميلليون تۋريست شەتەلدەن كەلگەن. سونداي-اق، 10 ميلليوننان استام ىشكى تۋريست ەل ىشىندە ساياحاتتاعان.

قازاقستانعا 87 ەلدىڭ ازاماتى ۆيزاسىز كەلە الادى، تاعى 107 ەلدىڭ ازاماتى ەلەكتروندى ۆيزامەن كىرە الادى.