قازاقستانعا چەحيادان كەرقۇلاندار جەتكىزىلمەك

قوستاناي. KAZINFORM - قوستاناي وبلىسىنىڭ وڭتۇستىك ءوڭىرى كەرقۇلانداردىڭ تاريحي مەكەنى. بۇل جىلقىلاردى بايىرعى قونىسىنا قايتارۋ ءۇشىن قازاقستان مەن چەحيا ماماندارى بىرلەسىپ جۇمىس ىستەپ جاتىر.

ەكى رەسپۋبليكا اراسىنداعى حالىقارالىق كەلىسىم اياسىندا سيرەك كەزدەسەتىن وسى جانۋاردىڭ 40 داراسى قوستاناي وبلىسىنا (امانگەلدى جانە جانگەلدى اۋداندارى) قايتا جەرسىندىرىلەدى.

العاشقى لەكپەن 8 كەرقۇلان 2024 -جىلدىڭ 4-ماۋسىمىندا «ءالىبي» رەينترودۋكتسيالاۋ ورتالىعىنا (امانگەلدى جانە جانگەلدى اۋداندارى) جەتكىزىلەدى. ولار ارقالىق اۋەجايىنا چەحيادان ەكى اسكەري ۇشاقپەن اكەلىنەدى.

قوستاناي وبلىسىنىڭ اكىمى قۇمار اقساقالوۆ اتاپ وتكەندەي، وبلىس قازىردىڭ وزىندە بەتپاقدالادا اقبوكەن پوپۋلياتسياسىن قالپىنا كەلتىرۋدە تابىسقا قول جەتكىزدى. ەندىگى كەزەك كەرقۇلاندارعا كەلدى.

فوتو: قوستاناي وبلىسىنىڭ اكىمدىگى

«بيلىك، عالىمدار، جاناشىر ادامداردىڭ بىرلەسكەن كۇش-جىگەرىنىڭ ارقاسىندا كەرقۇلاندار قوستاناي وبلىسىنىڭ فاۋناسىنىڭ اجىراماس بولىگىنە اينالادى جانە ءبىزدى كوپتەگەن جىلدار بويى سۇلۋلىعىمەن قۋانتادى دەپ سەنەمىز»، - دەپ اتاپ ءوتتى اكىم.

كەرقۇلانداردى رەينترودۋكسيالاۋ جوباسىنىڭ باستاماشىسى - قازاقستاننىڭ بيوالۋانتۇرلىلىك قاۋىمداستىعى.

بۇعان دەيىن «پرجەۆالسكي جىلقىسى» اتاۋى قازاقتىڭ ەجەلگى «كەرقۇلان»، «كەرتاعى» اتاۋلارىمەن تولىقتىرىلعان.

مۇنداي شەشىم ق ر ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ ۇيىمداستىرۋىمەن وتكەن جيىندا قابىلداندى.

اۆتور
زارينا تۋعانبايەۆا