قازاقستانعا اسەر ەتەتىنى ءسوزسىز: قاسىم-جومارت توقايەۆ قازىرگى الەمدىك احۋالعا توقتالدى

استانا. KAZINFORM - مەملەكەت باسشىسى قاسىم-جومارت توقايەۆ ەل عالىمدارىمەن بۇگىنگى كەزدەسۋىندە قازىرگى الەمدىك احۋالعا توقتالدى.

- كوپتەگەن ساراپشىلار دۇنيە ءجۇزى كەيىنگى ونداعان جىلدا بولماعان ەڭ اۋىر داعدارىستىڭ تابالدىرىعىندا تۇرعانىن مالىمدەدى. الپاۋىت مەملەكەتتەر ءبىر-بىرىنە قارسى «تاريف مايدانىن» اشقان سوڭ ءوندىرىس پەن ساۋدا تىزبەگىنىڭ بۇزىلعانى، نارىقتاردىڭ قۇلدىراپ، شيكىزات باعامىنىڭ تۇراقسىزدانا باستاعانى بايقالادى. بۇل بارلىق ەلگە، سونىڭ ىشىندە قازاقستانعا اسەر ەتەتىنى ءسوزسىز، - دەدى پرەزيدەنت.

ول قازىر جوعارى تاريفتەر ەنگىزۋگە 90 كۇندىك موراتوري جاريالانعانىمەن، نارىقتاعى جاعداي وتە تۇراقسىز ەكەنىن العا تارتتى.

- سوندىقتان ءبىز وسىناۋ ەكونوميكالىق دۇربەلەڭنىڭ قازاقستان ەكونوميكاسىنا تيگىزەتىن سالدارىن جويۋمەن اينالىسىپ جاتىرمىز. الايدا دۇرلىگۋگە سەبەپ جوق ەكەنىنە سەنىمدىمىن. ءبىز سىن-قاتەرلەردىڭ ءبارىن ءاردايىم ءوزىمىزدىڭ باسىم باعىتتارىمىزدى باسشىلىققا الا وتىرىپ ەڭسەرىپ كەلەمىز. سىرتقى قولايسىز فاكتورلاردىڭ ىقپالىنا قاراماستان دامۋدىڭ داڭعىل جولىن جالعاستىرا بەرەمىز. نەگىزگى ينفراقۇرىلىمدىق جوبالار مەن باسقا دا باستامالار تولىعىمەن ورىندالادى. كەشە ۇكىمەت پەن جەرگىلىكتى اتقارۋشى ورگانداردىڭ ءىس-قيمىل جوسپارىن شۇعىل اياقتاۋدى تاپسىردىم. بۇل قادام ءوسىم قارقىنى مەن ينۆەستيتسيا كولەمىن تومەندەتپەۋدى كوزدەيدى، - دەپ اتاپ ءوتتى قاسىم-جومارت توقايەۆ.

ونىڭ سوزىنە قاراعاندا، بۇگىندە ينۆەستيتسيا ءۇشىن كۇرەس ۇدەدى.

- سوندىقتان ءابجىل قيمىلداۋعا ءتيىسپىز. ءبىز بارلىق سىن-قاتەرگە دايىن بولعانىمىز ءجون. جۇمىستىڭ ءبارىن بايىپپەن ءارى سەنىمدى تۇردە اتقارۋ كەرەك. وزدەرىڭىزگە بەلگىلى، داعدارىستىڭ ءدا وز قايىرى بار. ول باسشىلىق قىزمەتتەگى ازاماتتاردىڭ ىسكەرلىك قابىلەتىنىڭ بار-جوعىن ايقىنداپ بەرەدى. سونداي-اق جاڭا مۇمكىندىكتەرگە جول اشادى. سىرتقى احۋال تۇبەگەيلى وزگەرگەن كەزەڭدە ۇلتتىق ەكونوميكانىڭ ورنىقتىلىعى مەن الەۋمەتتىك تۇراقتىلىقتى ساقتاۋ ءۇشىن مۇنىڭ ماڭىزى زور، - دەدى مەملەكەت باسشىسى.

ايتا كەتەيىك، بۇعان دەيىن پرەزيدەنت مەملەكەتتىڭ عىلىمدى دامىتۋ ءۇشىن ناقتى شارالار قابىلداپ جاتقانىن جەتكىزدى.