قازاقستانعا 87 ەلدىڭ ازاماتى ۆيزاسىز كەلە الادى

استانا. KAZINFORM - قازاقستانعا 87 ەلدىڭ ازاماتى ۆيزاسىز كەلە الادى، تاعى 107 ەلدىڭ ازاماتى ەلەكتروندى ۆيزامەن كىرە الادى. بۇل تۋرالى تۋريزم جانە سپورت ءمينيسترى ەربول مىرزابوسىنوۆ ۇكىمەتتىڭ بۇگىنگى وتىرىسىندا باياندادى.

− تۋريستىڭ جولى اۋەجايدان باستالىپ، قوناق ءۇي، مەيرامحانا مەن تۋريستىك نىساندارعا دەيىن جالعاسادى. وسى ارالىقتا ءاربىر كەزەڭدە قولايلى جاعداي جاسالۋ قاجەت. سوڭعى جىلدارى قازاقستان شەتەلدىك تۋريستەر ءۇشىن اناعۇرلىم اشىق ەلگە اينالدى. بۇگىندە 87 ەلدىڭ ازاماتى قازاقستانعا ۆيزاسىز، تاعى 107 ەلدىڭ ازاماتى ەلەكتروندى ۆيزامەن كىرە الادى، − دەدى سالا ءمينيسترى.

سونىمەن بىرگە، اۋە قاتىناسى دا كەڭەيىپ كەلەدى. «اشىق اسپان» ساياساتىنىڭ ارقاسىندا وتكەن جىلى 22 جاڭا مارشرۋت ىسكە قوسىلدى. بيىل تاعى 32 مارشرۋت جوسپارلانىپ وتىر.

− 2024 -جىلى ەلگە 15,3 ميلليون تۋريست شەتەلدەن كەلگەن. سونداي- اق، 10 ميلليوننان استام ىشكى تۋريست ەل ىشىندە ساياحاتتاعان. وسىنى ەسكەرە وتىرىپ، اسىرەسە جازعى ماۋسىمعا بارلىق دەڭگەيدەگى ورگاندار مۇقيات دايىندالۋى قاجەت، − دەدى ە. مىرزابوسىنوۆ.

بۇعان دەيىن الماتى مەن استانادان الاكولگە جەتۋ جەڭىلدەي تۇسكەنى حابارلانعان ەدى. ءۇرجار اۋدانىنا العاش رەت «SCAT» اۋە كومپانياسىنىڭ ۇشاقتارى قاتىناي باستادى.

سونداي-اق، قىتايدان كەلگەن تۋريستەر لەگى 9 ەسەگە ارتقان.