قازاقستان زاماناۋي كوشپەندىلەردى قابىلدايدى
استانا. KAZINFORM - ەندى زاماناۋي كوشپەندىلەر ەلىمىزدە ءبىر جىلعا دەيىن تۇرىپ، شەتەلدىك كومپانيالارداعى جۇمىسىن جالعاستىرا الادى.
ەلىمىزدە شەتەل ازاماتتارىنا ارنالعان جاڭا Neo Nomad ۆيزالىق رەجيمى ەنگىزىلگەنى ءمالىم. اتالعان ۆيزا قاشىقتان جۇمىس ىستەيتىن شەتەلدىك تۋريستەرگە ارنالعان. ەندى زاماناۋي كوشپەندىلەر ەلىمىزدە ءبىر جىلعا دەيىن تۇرىپ، شەتەلدىك كومپانيالارداعى جۇمىسىن جالعاستىرا الادى.
باعدارلاما مەملەكەت باسشىسىنىڭ تاپسىرماسى اياسىندا بىلتىر ىسكە قوسىلعان. جاڭا ۆيزالىق رەجيم پاندەميادان كەيىن وسىنداي باعدارلامالاردى ءساتتى ەنگىزگەن 50 دەن استام ەلدىڭ حالىقارالىق تاجىريبەسىن نازارعا العان. بۇگىندە الەمدە زاماناۋي كوشپەندىلەردىڭ سانى 35 ميلليوننان اسىپ وتىر جانە بۇل كورسەتكىش جىل سايىن ارتىپ كەلەدى.
Neo Nomad Visa الۋدىڭ نەگىزگى تالاپتارى:
قازاقستان اۋماعىنان تىس جەردە قاشىقتان جۇمىس ىستەۋ
اي سايىنعى ەڭ تومەنگى تابىس - 3000 ا ق ش دوللارىنان جوعارى
مەديتسينالىق ساقتاندىرۋ
سوتتىلىعى جوقتىعى تۋرالى انىقتاما
Neo Nomad Visa العان العاشقى شەتەلدىكتەردىڭ ءبىرى - ەۋروپالىق جورج روزا فيليۋ. ول استانادا التى اي تۇرۋدى جانە ەلىمىزدىڭ بىرنەشە ءوڭىرىن تۋريست رەتىندە ارالاپ كورۋدى جوسپارلاپ وتىر.
- قازاقستان حالقىنىڭ قوناقجايلىعى، ەلدەگى قاۋىپسىزدىك پەن تۇراقتى دامۋ - مەنىڭ بۇل ەلدى تاڭداۋىما سەبەپ بولدى. مۇندا ۇنەمى ءبىر قوزعالىس، دامۋ، جاڭاشىلدىققا ۇمتىلىس بايقالادى. مەن وسى جۇيەنىڭ ءبىر بولشەگى بولعىم كەلەدى، - دەيدى جورج روزا فيليۋ.
سونداي-اق ول ۆيزانى راسىمدەۋ ۇدەرىسىنىڭ قاراپايىمدىلىعىن جانە ليسسابونداعى قازاقستان كونسۋلدىعىنداعى قىزمەت ساپاسىنىڭ جوعارى ەكەنىن اتاپ ءوتتى. راسىمدەۋ ۋاقىتى - 5 جۇمىس كۇنىنەن اسپايدى.
باعدارلامانىڭ ەكونوميكالىق تيىمدىلىگى دە ەسەپتەلگەن: ماسەلەن، 500 ادام ۆيزا السا، ەل بيۋدجەتىنە شامامەن 3,6 ميلليارد تەڭگە تابىس تۇسەدى. Neo Nomad ۆيزاسىن پايدالاناتىن شەتەلدىك ازاماتتار قازاقستاندا تۇرىپ، قاراجاتىن وسىندا جۇمسايدى، ءبىراق وتاندىق ەڭبەك نارىعىنا اسەر ەتپەيدى.
قازىرگى تاڭدا Neo Nomad Visa-نى ۇلى بريتانيا، ا ق ش، فرانسيا، پولشا، وڭتۇستىك كورەيا، ب ا ءا جانە تايلاند ازاماتتارى العان.
ايتا كەتەلىك ە و-نىڭ قازاقستانعا ۆيزا رەجيمىن جەڭىلدەتۋگە ارنالعان كەلىسىم قاشان بەكىتىلەتىنى تۋرالى جازعان ەدىك.
