قازاقستان يزرايلدىڭ سۋ رەسۋرستارىن باسقارۋ ادىستەرىن زەرتتەيدى

ق ر پرەمەر-ءمينيسترى ءاليحان سمايىلوۆ پەن «يزرايل-قازاقستان» ساۋدا-ونەركاسىپ پالاتاسىنىڭ ءتوراعاسى ميحاەل روە قازاقستاندا اگروونەركاسىپ كەشەنىن دامىتۋ جانە سۋ رەسۋرستارىن باسقارۋ جونىندەگى يزرايلدىك تاجىريبەنى قولدانۋ پەرسپەكتيۆالارىن تالقىلادى، دەپ حابارلايدى قازاقپارات ق ر ۇكىمەتىنىڭ باسپا ءسوز قىزمەتىنە سىلتەمە جاساپ.

Үкімет
Фото: primeminister.kz

كەزدەسۋ بارىسىندا سۋارۋ تيىمدىلىگىن ارتتىرۋ، سۋدى ۇنەمدەۋ، تامشىلاتىپ سۋارۋدىڭ زاماناۋي تەحنولوگيالارىن ەنگىزۋ، اگرارلىق عىلىمدى دامىتۋ، سونداي-اق مال شارۋاشىلىعىندا، ءسۇت وندىرۋدە جانە قۇس شارۋاشىلىعىندا جاڭا تاسىلدەردى قولدانۋ ماسەلەلەرى جان-جاقتى تالقىلاندى.

ءاليحان سمايىلوۆ ق ر ۇكىمەتى سەرىكتەستىكتى كەڭەيتۋگە جانە يزرايلمەن كوپقىرلى ءوزارا ءتيىمدى قارىم-قاتىناستاردى نىعايتۋعا ۇلكەن ءمان بەرەتىنىن باسا ايتتى. اتاپ ايتقاندا، ول ەلدىڭ اۋىل شارۋاشىلىعى سالاسىنداعى ۇزدىك جەتىستىكتەرى قىزىعۋشىلىق تۋدىرۋدا.

«ءبىز يزرايلدىك تەحنولوگيالاردى زەرتتەۋگە جانە ولاردى اگروونەركاسىپ كەشەنىن دامىتۋعا سەرپىن بەرۋ ءۇشىن تارتۋعا دايىنبىز. سۋارۋ جانە سۋ ۇنەمدەۋ ماسەلەلەرى دە وتە وزەكتى. ءبىز مەملەكەتتىڭ وسى سالاعا باعىتتاپ وتىرعان قاراجاتىنىڭ تيىمدىلىگىن ارتتىرىپ، ناقتى ناتيجەلەرگە قول جەتكىزگىمىز كەلەدى»، — دەدى پرەمەر-مينيستر.

بۇل رەتتە، ول ءاربىر دەڭگەيدى جەكە قاراپ، قاجەتتى تۇزەتۋلەر ەنگىزىپ وتىرۋ ءۇشىن بۇكىل وندىرىستىك تسيكلدى ەسكەرۋ ماڭىزدى ەكەنىن ايتتى.

«مىسالى، اگرەگاتتار قۇراستىرۋ، ماشينا جاساۋ جانە باسقا دا جابدىقتاردى وزىمىزدە شىعارۋ ءۇشىن مەملەكەت تاراپىنان قانداي قولداۋ شارالارى بولۋى كەرەك، عىلىم، ءبىلىم جانە ءوندىرىس سالالارىنان قانداي قولداۋ قاجەت بولادى. مۇنىڭ بارلىعىن كەشەندى تۇردە قاراستىرۋ كەرەك. ءبىز بۇل باعىتتار بويىنشا بىرلەسىپ جۇمىس ىستەۋگە دايىنبىز»، — دەدى ءاليحان سمايىلوۆ.

ءوز كەزەگىندە ميحاەل روە قازاقستاننىڭ ىشكى نارىق قاجەتتىلىكتەرىن تولىعىمەن وتەۋگە الەۋەتى جەتكىلىكتى ەكەنىن جانە اوك- ءتى دامىتۋدىڭ كەشەندى ءتاسىلى ارقىلى جاھاندىق ازىق-تۇلىك قاۋىپسىزدىگىن قامتاماسىز ەتۋگە زور ۇلەس قوسا الاتىنىن اتاپ ءوتتى.

ول مەملەكەت باسشىسىنىڭ جولداۋىن ىسكە اسىرۋ شەڭبەرىندە اۋىل شارۋاشىلىعى سالاسىندا يزرايلدىك اگروتەحنولوگيالار مەن سۋ رەسۋرستارىن باسقارۋ ادىستەرىن قولدانۋعا كەشەندى قولداۋ كورسەتۋدى ۇسىندى.

كەزدەسۋ قورىتىندىسىنا سايكەس تاجىريبە الماسۋ جانە بارلىق ايتىلعان ماسەلەلەر بويىنشا بىرلەسكەن جۇمىستى جاقىن ارادا ۇيىمداستىرۋ تۋرالى ۋاعدالاستىققا قول جەتكىزىلدى.

سونداي-اق كەزدەسۋگە يرريگاتسيا جانە سۋ رەسۋرستارى ءمينيسترى نۇرجان نۇرجىگىتوۆ پەن اۋىل شارۋاشىلىعى ءمينيسترى ايداربەك ساپاروۆ قاتىستى.

سوڭعى جاڭالىقتار