قازاقستان يرانعا مۇزداتىلعان ەت ەكسپورتتاماق

ەكى جاقتى مەموراندۋمعا 2023 -جىلدىڭ 3-جەلتوقسانى كۇنى تەگەراندا ءمينيستردىڭ ورىنباسارى جانە يراننىڭ ۆەتەرينارلىق ۇيىمىنىڭ باسشىسى مودجتابا نورۋزي مەن قازاقستاننىڭ اۋىل شارۋاشىلىعى ۆيتسە-ءمينيسترى امانعالي بەردالين قول قويدى. بۇل تۋرالى Kazinform ق ر اۋىل شارۋاشىلىعى مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.

بۇل قۇجات وتاندىق مال شارۋاشىلىعىنىڭ مۇزداتىلعان ەتىن جەتكىزۋدىڭ جاڭا ەكسپورتتىق جولدارىن اشادى. وسى ۋاقىتقا دەيىن قازاقستاندىق وندىرۋشىلەر يرانعا ساقتاۋ مەرزىمى 3 كۇنگە دەيىنگى سالقىنداتىلعان سيىر ەتىن عانا جەتكىزە الاتىن.

ۋاعدالاستىق تۋرالى قۇجاتتا مىناداي تالاپتار قاراستىرىلعان:

1. قازاقستاندىق مۇزداتىلعان سيىر ەتىنىڭ سۇيەكسىز يمپورتىنا قويىلاتىن ۆەتەريناريالىق-سانيتاريالىق تالاپتار.

يران تاراپى قازاقستاننان مۇزداتىلعان سۇيەكسىز سيىر ەتىنىڭ يمپورتىنا قويىلاتىن ۆەتەريناريالىق-سانيتاريالىق تالاپتاردى ۇسىنادى. ۆەتەريناريالىق-سانيتاريالىق تالاپتاردى كەلىسكەننەن كەيىن قازاقستاننان يرانعا مۇزداتىلعان سۇيەكسىز سيىر ەتىنىڭ ەكسپورتىن اشۋ ءۇشىن يران ۆەتەريناريالىق ۇيىمىنىڭ باسشىلارى مەن قازاقستان رەسپۋبليكاسى اۋىل شارۋاشىلىعى مينيسترلىگى ۆەتەريناريالىق باقىلاۋ جانە قاداعالاۋ كوميتەتىنىڭ ءتوراعاسى اراسىندا ۆەتەريناريالىق سەرتيفيكاتتاردى كەلىسەدى جانە كەلىسىمگە قول قويادى.

2. يراندىق ءسۇت كومپانيالارىن ەۋرازيالىق ەكونوميكالىق وداقتىڭ (ە ا ە و) اۋماعىنا جانە قازاقستان رەسپۋبليكاسىنا يمپورتتاۋعا قۇقىعى بار ءۇشىنشى ەلدەردىڭ تىزىلىمىنە ەنگىزۋ تۋرالى.

قازاقستاندىق تاراپ ە ا ە و جانە قازاقستان رەسپۋبليكاسى ينسپەكتورلارىنىڭ، يراننىڭ ۆەتەريناريالىق قىزمەتىنىڭ جانە يراننىڭ ءسۇت كاسىپورىندارىنىڭ قاتىسۋىمەن اۋديت جانە بىرلەسكەن ينسپەكتسيا وتكىزىلگەننەن كەيىن، ە ا ە و اۋماعىنا جانە قازاقستان رەسپۋبليكاسىنا ءسۇت ونىمدەرىن يمپورتتاۋعا قۇقىعى بار ءۇشىنشى ەلدەردىڭ تىزىلىمىنە يران ءسۇت كاسىپورىندارىن قوسۋ تۋرالى ىنتىماقتاسۋعا دايىن.

3. ۆاكۋۋمدىق قاپتاماداعى ءىرى قارا مالدىڭ جاڭا ەتىنىڭ جارامدىلىق مەرزىمىنە قاتىستى عىلىمي قۇجاتتار

قازاقستان تاراپىنىڭ ۆاكۋۋمدى قاپتاماداعى ءىرى قارا مالدىڭ جاڭا ەتىنىڭ جارامدىلىق مەرزىمىن 3 كۇننەن 16 كۇنگە دەيىن ۇلعايتۋ ءوتىنىشى بويىنشا يران تاراپى قازاقستاننان جارامدىلىق مەرزىمىنە قاتىستى عىلىمي قۇجاتتاردى سۇرادى. يراننىڭ ۆەتەرينارلىق ۇيىمى يمپورت جانە ەكسپورت بويىنشا تەحنيكالىق كوميتەتتە ۇسىنىلعان قۇجاتتاردى قارايدى.

اۆتور
ايدار وسپاناليەۆ