قازاقستان وڭتۇستىك كورەياعا تابيعي ۋران جەتكىزۋدى قايتا باستايدى - مۇرات نۇرتىلەۋ

قازاقستان وڭتۇستىك كورەياعا تابيعي ۋران جەتكىزۋدى قايتا باستايدى. بۇل تۋرالى «ورتالىق ازيا - كورەيا رەسپۋبليكاسى» 16-ىنتىماقتاستىق فورۋمىندا پرەمەر-ءمينيستردىڭ ورىنباسارى - سىرتقى ىستەر ءمينيسترى مۇرات نۇرتىلەۋ ايتتى، دەپ حابارلايدى Kazinform ءتىلشىسى.

«ءسوز سوڭىندا ءوزارا ءىس-قيمىلىمىزدىڭ قوسىمشا جان-جاقتى پايىمداۋدى قاجەت ەتەتىن كەيبىر ماڭىزدى اسپەكتىسىنە نازار اۋدارعىم كەلەدى. كەيىنگى بىرنەشە جىلدا ءبىزدىڭ ساۋدا-ەكونوميكالىق بايلانىستارىمىزدا وڭ ءۇردىس بايقالعانىنان باستايىن. ورتالىق ازيانىڭ وڭتۇستىك كورەيامەن ساۋدا كولەمى 2022-جىلى وڭ ديناميكانى كورسەتىپ، شامامەن 8 ميلليارد دوللاردى قۇرادى. وسى تاۋار اينالىمىنىڭ 70 پايىزدان استامى قازاقستانعا تيەسىلى. وڭتۇستىك كورەيا تۇراقتى تۇردە ءبىزدىڭ ەكونوميكامىزداعى ەڭ ءىرى 10 ينۆەستوردىڭ قاتارىنا كىرەدى»، - دەدى مۇرات نۇرتىلەۋ.

قازاقستان سىرتقى ىستەر ءمينيسترى بۇگىندە ەلىمىزدە اۆتوموبيل جاساۋ، جاڭا وزىق تەحنولوگيالار مەن ءبىلىم بەرۋ، ەنەرگەتيكا، مەديتسينا سىندى سالالاردا 2 ميلليارد دوللار سوماسىنا 30 عا جۋىق اۋقىمدى ينۆەستيتسيالىق جوبا بار ەكەنىن اتاپ ءوتتى. سونىمەن قاتار كومىرسۋتەك شيكىزاتىن جەتكىزۋ سالاسىندا دا ۇلكەن پەرسپەكتيۆالار بارىن تىلگە تيەك ەتتى.

ونىڭ دەرەگىنشە، وتكەن جىلى وڭتۇستىك كورەياعا قازاقستاندىق مۇنايدىڭ جەتكىزىلىمى 2 ەسەدەن ءوستى. بيىل 8 ايدا بۇل كورسەتكىش 4,6 ميلليون تونناعا دەيىن ارتتى.

«بۇعان قوسا، كەلەشەكتە قازاقستان وڭتۇستىك كورەياعا تابيعي ۋراندى ۇزاق مەرزىمدى جەتكىزۋدى قايتا باستايدى. سونىمەن قاتار ءبىز وڭتۇستىك كورەياعا مۇناي حيمياسى، مەتاللۋرگيا، اۋىل شارۋاشىلىعى جانە ازىق-تۇلىك ونىمدەرىنىڭ ەكسپورتىن ۇلعايتۋعا دايىنبىز. وڭىردەگى كورشىلەرىمىزدىڭ دە ءوز رەزەرۆتەرى بار ەكەنىنە سەنىمدىمىن. جوعارىدا ايتىلعانداردى ەسكەرە وتىرىپ، فورۋمنىڭ كەلەسى وتىرىسىنىڭ كۇن تارتىبىنە ەنەرگەتيكا، اۋىل شارۋاشىلىعى جانە سيرەك مەتالدار سياقتى باسىم باعىتتاردى ەنگىزۋدى ۇسىنامىن»، - دەپ تۇيىندەدى ءسوزىن مۇرات نۇرتىلەۋ.