قازاقستان ورتالىق ازيا مەن تاياۋ شىعىستا سيفرلىق ۆاليۋتا ەنگىزۋدەن كوش باستاپ تۇر
استانا. KAZINFORM - «سيفرلىق تەڭگە» جوباسىن دامىتۋ بويىنشا 2025-جىلى بىرنەشە باعىتتا جۇمىستار جوسپارلانعان. بۇل تۋرالى قازاقستان ۇلتتىق بانكىنىڭ «ۇلتتىق سيفرلىق قارجى ينفراقۇرىلىمىن دامىتۋ تۋرالى» (ۇ ت س ق ي) جىلدىق ەسەبىندە جاريالاندى.

2024-جىلى «سيفرلىق تەڭگە» جوباسىنىڭ ەكىنشى كەزەڭى اياسىندا مەملەكەتتىك جانە باعدارلامالاناتىن تولەمدەردە سيفرلىق ۆاليۋتانى پايدالانۋدىڭ جاڭا سەناريلەرى سىناقتان وتكىزىلىپ، ەل ەكونوميكاسىنا تولىق كولەمدە ەنگىزۋ ءۇشىن نەگىز قالاندى.
- «سيفرلىق تەڭگە» جوباسى بويىنشا جۇمىس اياسىندا 2024-جىلى تاۋەلسىز باقىلاۋشىلار جوعارى باعا بەرگەن ءبىرقاتار ەلەۋلى ناتيجەگە قول جەتكىزىلدى. اتاپ ايتقاندا، حالىقارالىق ۆاليۋتا قورىنىڭ مالىمەتىنە قاراعاندا، قازاقستان ورتالىق ازيا مەن تاياۋ شىعىس ەلدەرى اراسىندا ورتالىق بانكتىڭ سيفرلىق ۆاليۋتاسىن ەنگىزۋ ماسەلەسىندە جەتەكشى ورىنعا يە بولدى. 2024-جىلى «سيفرلىق تەڭگە» جوباسى Currency Research حالىقارالىق ۇيىمىنىڭ «سيفرلىق ۆاليۋتالاردى قابىلداۋداعى كوشباسشىلىق» اتالىمى بويىنشا جۇلدەسىن جەڭىپ الدى، - دەپ اتالىپ وتكەن ۇلتتىق بانكى ەسەبىندە.
بۇل تۇرعىدا 2024-جىلعى جۇمىستىڭ نەگىزگى باعىتى - مەملەكەتتىڭ قاتىسۋىمەن تولەمدەر باعىتىن قامتۋ. وسى باعىت اياسىندا سيفرلىق تەڭگە جۇيەسىنىڭ باعدارلامالاۋ قاسيەتتەرىن پايدالانا وتىرىپ، 5 سەناري ىسكە اسىرىلىپ، كەمىندە 238 ميلليارد سيفرلىق تەڭگە شىعارىلدى، سونداي-اق مەملەكەتتىك اقپاراتتىق جۇيەلەرمەن ينتەگراتسيالار جۇرگىزىلدى.
مۇنىمەن قوسا، ۇلتتىق بانك ەسەبىندە 2025-جىلعا ارنالعان «سيفرلىق تەڭگە» جوباسىن دامىتۋ بويىنشا بىرنەشە باعىت جوسپارلانعانى باياندالعان.
- ۇلتتىق سيفرلىق ۆاليۋتانى جانە ونىڭ ارتىقشىلىقتارىن تولىققاندى ىسكە اسىرۋ ءۇشىن ءتيىستى نورماتيۆتىك- قۇقىقتىق نەگىز قاجەت. 2025-جىلى 2023 جانە 2024-جىلعى جۇمىستار نەگىزىندە اقپاراتتىق تەحنولوگيالار قىزمەتىنىڭ زاڭنامالىق نەگىزىن بەكىتۋ جوسپارلانعان... 2025-جىلعا بارلىق قاتىسۋشىمەن تولىق ينتەگراتسيا جاعدايىندا سيفرلىق ۆاليۋتاداعى ترانسشەكارالىق تولەمدەردىڭ بازالىق سەناريىن تەستىلەۋ جوسپارلانعان، - دەپ اتالىپ وتكەن ۇ ب اقپاراتىندا.
2025-جىل ۇلتتىق سيفرلىق ۆاليۋتانى كەزەڭ-كەزەڭمەن ەنگىزۋ بويىنشا سوڭعى جىل سانالادى. ت س ت پلاتفورماسىن پايدالانۋعا ەنگىزۋ وسى جوسپاردى ورىنداپ قانا قويماي، ۇلتتىق قارجىلىق ينفراقۇرىلىمنىڭ ماڭىزدى قۇرامداس بولىگىن قۇرادى.
ايتا كەتەيىك، قازاقستاندا سيفرلىق تەڭگەنى 2025-جىلدىڭ سوڭىنا دەيىن تولىقتاي ەنگىزۋ جوسپارلانىپ وتىر.
وسىعان دەيىن 2024-جىلدىڭ سوڭىنا دەيىن تسيفرلىق تەڭگەدەگى ترانزاكتسيا اينالىمى 200 ميلليارد تەڭگەدەن اساتىنى حابارلاندى.
بىلتىر جازدا ۇلتتىق بانك ءتوراعاسى تيمۋر سۇلەيمەنوۆ مەملەكەتتىڭ ساتىپ الۋ جۇيەسىندەگى جەمقورلىققا تسيفرلىق تەڭگە ارقىلى توسقاۋىل قويۋ جوسپارى بار ەكەنىن ءمالىم ەتتى.