قازاقستان ۇ و ك جانە حالىقارالىق وليمپيادا كوميتەتى ىنتىماقتاستىقتى نىعايتادى
استانا. KAZINFORM - قازاقستان ۇلتتىق وليمپيادالىق كوميتەتىنىڭ پرەزيدەنتى گەننادي گولوۆكين، ق ر تۋريزم جانە سپورت ءمينيسترى ەربول مىرزابوسىنوۆ جانە حالىقارالىق وليمپيادالىق كوميتەتىنىڭ سپورت جونىندەگى ديرەكتورى كيت ماككوننەلل الداعى وليمپيادا ويىندارىنا دايىندىق جانە ەكىجاقتى ىنتىماقتاستىقتى نىعايتۋ ماسەلەلەرىن تالقىلاۋعا ارنالعان كەلىسسوزدەرگە قاتىستى. بۇل تۋرالى كوميتەتتىڭ باسپا ءسوز قىزمەتى مالىمدەدى.
ميلان مەن كورتينادا وتەتىن 2026 -جىلعى قىسقى وليمپيادا ويىندارى، لوس-اندجەلەستەگى 2028 -جىلعى جازعى وليمپيادا، ەر-ريادتا 2025 -جىلى وليمپيادا اياسىندا العاش رەت وتەتىن كيبەرسپورت جارىستارى جانە داكارداعى 2025 -جىلعى جاسوسپىرىمدەر وليمپياداسى كەزدەسۋدە باستى تاقىرىپتاردىڭ ءبىرى بولدى. كەلىسسوزدەر بارىسىندا جارىستاردىڭ باعدارلاماسى، كولىك- لوگيستيكالىق قامتاماسىز ەتۋ، مادەني جانە ءبىلىم بەرۋ ءىس-شارالارى سەكىلدى ماڭىزدى ماسەلەلەر قارالدى.
تاراپتار بىرلەسكەن جۇمىس پەن تاجىريبە الماسۋدىڭ حالىقارالىق ءىس-شارالاردى جوعارى دەڭگەيدە ۇيىمداستىرۋعا قامتاماسىز ەتۋدەگى ماڭىزدىلىعىن اتاپ ءوتتى.
ح و ك-نىڭ سپورت جونىندەگى ديرەكتورى كيت ماككوننەلل قازاقستاننىڭ حالىقارالىق ىنتىماقتاستىقتى نىعايتۋداعى كۇش-جىگەرىن جوعارى باعالاپ، گەننادي گولوۆكيننىڭ World Boxing ۇيىمىنىڭ وليميادالىق كوميسسياسىنىڭ ءتوراعاسى رەتىندەگى بوكستى وليمپيادا باعدارلاماسىندا ساقتاۋ پروتسەسىندەگى ۇلەسىن ەرەكشە اتاپ ءوتتى. قازاقستان ۇوك باسشىسى حالىقارالىق وليمپيادالىق كوميتەتىمەن ىنتىماقتاستىقتى كۇشەيتۋگە دايىن ەكەنىن جەتكىزدى.
- وليمپيادا ويىندارىنا دايىندىق - بۇل كۇردەلى ءارى جاۋاپتى ءىس. قازاقستان حالىقارالىق وليمپيادالىق كوميتەتىمەن بەلسەندى كەلىسسوزدەر جۇرگىزىپ جاتقانىنا قۋانىشتىمىز. ح و ك وكىلدەرىنىڭ بۇل ساپارىن ەكىجاقتى ىنتىماقتاستىقتى نىعايتۋ جولىنداعى ماڭىزدى قادام دەپ ەسەپتەيمىز. قازاقستان ءارقاشان كەلىسسوزدەر مەن سپورتتى دامىتۋعا جانە وليمپيادالىق قوزعالىستى قولداۋعا باعىتتالعان بىرلەسكەن جۇمىسقا دايىن، - دەپ اتاپ ءوتتى گەننادي گولوۆكين.
كەزدەسۋگە قاتىسۋشىلار سپورتشىلاردى قولداۋ، وليمپيادالىق سپورت تۇرلەرىن دامىتۋ جانە وليمپيادالىق قۇندىلىقتاردى ناسيحاتتاۋعا باعىتتالعان بىرلەسكەن جوبالاردى جۇزەگە اسىرۋدىڭ بولاشاعىن قاراستىردى.
كەلىسسوزدەردەن بولەك، ح و ك دەلەگاتسياسى استانانىڭ باستى سپورتتىق نىساندارىن، سونىڭ ىشىندە «بارىس ارەنا» مۇز سارايىن، «Qazaqstan» جەڭىل اتلەتيكا كەشەنىن جانە «جاقسىلىق ۇشكەمپىروۆ اتىنداعى جەكپە-جەك سارايىن» ارالادى. حالىقارالىق قوناقتار ينفراقۇرىلىمنىڭ جوعارى ساپاسىن جانە ونىڭ الەمدىك ستاندارتتارعا سايكەستىگىن ەرەكشە اتاپ ءوتتى.
