قازاقستان تۇرمەلەرىندەگى 1 مىڭنان استام ايەل راقىمشىلىققا ءىلىنۋى مۇمكىن

استانا. KAZINFORM - ىشكى ىستەر ءمينيسترى ەرجان سادەنوۆ ءماجىلىس دەپۋتاتتارىنىڭ تۇرمەدە وتىرعان ايەلدەردىڭ ءبىر بولىگىنە راقىمشىلىق شاراسىن قولدانۋ تۋرالى ساۋالىنا جاۋاپ بەردى.

- بۇگىنگى تاڭدا 6399 ايەل قىلمىستىق قۇقىق بۇزۋشىلىق جاساعانى ءۇشىن جازاسىن وتەپ جاتىر. ونىڭ 2692 سى باس بوستاندىعىنان ايىرۋ ورىندارىندا ۇستالسا، 3707 سى پروباتسيالىق باقىلاۋدا. قىلمىستىق كودەكستىڭ 78-بابىنا سايكەس، اۋىرلىعى از جانە ورتاشا قىلمىستارى ءۇشىن سوتتالعان 1220 ايەل جازاسىن وتەۋدەن بوساتىلۋى مۇمكىن. سونىمەن قاتار، زورلىق-زومبىلىققا بايلانىستى ەمەس قىلمىستار جاساعانى ءۇشىن 2002 ايەل سوتتالدى، ولاردىڭ 1766 سى العاش رەت، ال 150 ى اۋىرلىعى شاعىن جانە ورتاشا قىلمىستار جاساعان. ءوز كەزەگىندە اۋىر جانە اسا اۋىر قىلمىستار جاساعان 5055 ايەلگە جازا مەرزىمى قىسقارتىلۋى مۇمكىن، - دەپ جازىلعان جاۋاپتا.

مينيسترلىك جاۋابىندا راقىمشىلىقتى قاراۋ كەزىندە جاسالعان قىلمىستىڭ اۋىرلىعىمەن قاتار، سوتتالعانداردىڭ الەۋمەتتىك جاعدايىن قوسىمشا ەسكەرۋ قاجەتتىگى ايتىلعان.

رەسمي دەرەك بويىنشا، سوتتالعانداردىڭ ىشىندە 29 ايەلدىڭ مۇگەدەكتىگى بار (I توپ - 3، II توپ-3، III توپ - 15)، 60 جاستان اسقان 243 ايەل (ت م-152، پ ق-91)، 13 جۇكتى ايەل، 58 كىشكەنتاي بالالارى بار (3 جاسقا دەيىن) جانە 226 كوپبالالى انا بار.

- باس بوستاندىعىنان ايىرۋدى جازانىڭ نەعۇرلىم جەڭىل تۇرىنە اۋىستىرۋ جولىمەن (3910) وتەلمەگەن تالاپ-ارىزدارى بار ايەلدەر ءۇشىن جازانى جەڭىلدەتۋدى كوزدەۋ قاجەت. الايدا، قازاقستان رەسپۋبليكاسى كونستيتۋتسياسىنىڭ 14-بابىنىڭ تالاپتارىن ەسكەرۋ قاجەت، وعان سايكەس زاڭ مەن سوت الدىندا بارلىعى تەڭ. ەشكىمدى جىنىسىنا بايلانىستى كەمسىتۋگە بولمايدى. الەۋمەتتىك وسال ادامدار ساناتىنا جاتاتىن سوتتالعان ەرلەر سانى - 920 ادام (I جانە II توپتاعى مۇگەدەكتىگى بار ادامدار، مۇگەدەك بالالاردى تاربيەلەپ وتىرعان ۇ و س قاتىسۋشىلارى، زەينەتكەرلەر، تولىق ەمەس وتباسىلار). سونىمەن قاتار، ءبىرىنشى رەت سوتتالعانداردى جانە زورلىق-زومبىلىقسىز قىلمىستار جاساعانداردى بوساتۋ ماسەلەسى جابىرلەنۋشىلەردىڭ قۇقىقتارىن قورعاۋدى ەسكەرە وتىرىپ، ودان ءارى تالداۋدى قاجەت ەتەدى. وسىلايشا، ەكى مىڭنان استام سوتتالعاندى بوساتۋ بيۋدجەتتى كۇنىنە 5,8 ميلليون تەڭگەگە دەيىن ۇنەمدەۋگە مۇمكىندىك بەرۋى ىقتيمال (1 سوتتالعانعا جالپى شىعىندار كۇنىنە - 2900 تەڭگە، تيىسىنشە جىلىنا - 2,1 ميلليارد تەڭگە)، - دەلىنگەن جاۋاپتا.

بۇعان دەيىن ەسىرتكى ىسىمەن تۇرمەدە وتىرعاندار جازاسىن قاي جاعدايدا جەڭىلدەتە الاتىنىن جازعان ەدىك.