قازاقستان ترانسشەكارالىق وزەندەر سۋىن پايدالانۋدى رەتتەيتىن حالىقارالىق كونۆەنتسياعا قوسىلدى
استانا. KAZINFORM - سۋ رەسۋرستارى جانە يرريگاتسيا مينيسترلىگى ترانسشەكارالىق وزەندەردىڭ سۋىن بىرلەسىپ پايدالانۋ ماسەلەسىن حالىقارالىق سۋ اعىندارىن كەمە قاتىناسىنان باسقاشا پايدالانۋ تۇرلەرىنىڭ قۇقىعى تۋرالى كونۆەنتسيا اياسىندا شەشۋگە نيەتتى. ق ر پارلامەنتىنىڭ سەناتى حالىقارالىق كونۆەنتسيانى راتيفيكاتسيالاۋ تۋرالى زاڭدى ماقۇلدادى.
كونۆەنتسيا ترانسشەكارالىق وزەندەر مەن كولدەردى جانە ولارمەن بايلانىستى جەراستى سۋلارىن ءادىل ءبولىنۋىن قامتاماسىز ەتەتىن جانە ونى پايدالانۋدى رەتتەيتىن حالىقارالىق قۇجات بولىپ تابىلادى. قازىرگى كەزدە 37 مەملەكەت كونۆەنتسيانىڭ قاتىسۋشىسى.
حالىقارالىق كەلىسىم سۋ بولۋگە قاتىستى ىقتيمال داۋلاردى شەشۋ ءۇشىن جانە بارلىق تاراپتىڭ مۇددەسىنە ساي سۋ رەسۋرستارىن دامىتۋعا مەملەكەتتەر اراسىنداعى ىنتىماقتاستىق تەتىكتەرىن جاسايدى.
كونۆەنتسياعا سايكەس سۋ اعىنى مەملەكەتى ءوز اۋماعىندا حالىقارالىق سۋ اعىنىن پايدالانۋ كەزىندە باسقا مەملەكەتتەرگە زيان كەلتىرۋمەۋ ءۇشىن ءتيىستى ءىس-شارالاردى قابىلدايدى. سونداي-اق سۋ اعىنى، سۋدىڭ ساپاسى جانە ءتيىستى بولجامدار تۋرالى قولجەتىمدى دەرەكتەرمەن تۇراقتى نەگىزدە بولىسەدى. بۇدان بولەك، سۋ اعىنى مەملەكەتتەرى ءبىر-بىرىنە كەڭەس بەرەدى، جوسپارلانعان ءىس-شارالاردىڭ حالىقارالىق سۋ اعىنىنا اسەرى تۋرالى كەلىسسوز جۇرگىزەدى.
«ماسەلەن، كونۆەنتسيادا گيدروتەحنيكالىق قۇرىلىستار سالۋ ءىس-قيمىلى بويىنشا ناقتى شارالار ايقىندالعان. اتاپ ايتقاندا، مۇددەلى تاراپتاردىڭ كەلىسىمىنسىز جۇزەگە اسىرۋعا سانكسيا بەرمەيدى دەپ جازىلعان. وسى تۇرعىدا، كورشى مەملەكەتتەرمەن ىنتىماقتاستىق شەڭبەرىندە سۋ شارۋاشىلىعى ءىس-شارالارىن كەلىسىپ اتقارۋ قامتاماسىز ەتىلەتىن بولادى. بۇدان بولەك، مينيسترلىك ترانسشەكارالىق وزەندەردىڭ سۋىن بىرلەسىپ پايدالانۋ ماسەلەسىن مەملەكەتارالىق سۋ شارۋاشىلىعى كوميسسياسى ارقىلى دا شەشەتىن بولادى»، - دەدى ق ر سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى بولات بەكنياز.
