قازاقستان TikTok تى جاپسا، نەدەن ۇتىلادى - BIP House پروديۋسەرى پىكىر
استانا. KAZINFORM - كەيىنگى كۇندەرى TikTok جابىلا ما، الدە ءىشىنارا شەكتەلە مە دەگەن ساۋال كۇن تارتىبىنە شىعىپ الدى.
ءماجىلىس دەپۋتاتى ەرلان سايروۆ پرەمەر- ءمينيستردىڭ اتىنا جولداعان دەپۋتاتتىق ساۋالىندا TikTok-تاعى زاڭعا قايشى بارلىق كونتەنتتى شەكتەۋ كەرەك دەگەن پايىمىن ءبىلدىردى. مادەنيەت جانە اقپارات ءمينيسترى ايدا بالايەۆانىڭ «ماسەلە قاراستىرىلادى» دەگەن پىكىرى ەلدەگى جەتەكشى TikTok-حاۋستاردىڭ باسشىلارىن دا الاڭداتىپ وتىرعان سىڭايلى.
ت م د كولەمىندەگى ەڭ تانىمال پلاتفورما BIP House نەگىزىن قالاۋشى اسحات حاليموۆ Kazinform تىلشىسىنە وسى توڭىرەكتەگى باستامالار تۋرالى پىكىر ءبىلدىردى.
«ءبىزدىڭ ويىمىزشا، بۇعاتتاۋ دەگەن سونداي ءبىر ويلانىپ بارىپ قابىلدانعان شەشىم بولماس. قازىر قازاقستان بۇل تۇرعىدا وزگە ەلدەردىڭ الدىندا باسەكەلەستىك باسىمدىققا يە. ورتالىق ازيانىڭ، ءتىپتى بۇكىل ازيانىڭ ەڭ تانىمال TikTok بلوگەرلەرى بىزدە. ءبىز - ادامدارعا كرەاتيۆتى كونتەنتىن دامىتۋ مۇمكىندىگىن بەرىپ وتىرعان تازا دەموكراتيانىڭ ايلاعىمىز. كرەاتيۆتى يندۋستريا فورۋمىندا پرەزيدەنتپەن كەزدەسكەندە ول كىسى دە TikTok وكىلى قازاقستانعا كەلىپ وزىمەن كەزدەسكەنىن ايتتى. YouTube نەمەسە Instagram وكىلدەرىنىڭ مەملەكەت باسشىسىمەن كەلىپ كەزدەسكەنىن ەستىمەپپىن»، - دەيدى اسحات حاليموۆ.
ونىڭ مالىمەتى بويىنشا، ەلدە 32 TikTok-حاۋس بار. ونىڭ ەكەۋى ت م د بويىنشا ەڭ تانىمال پلاتفورما بولىپ ەسەپتەلەدى. بۇل الەۋەت قازاقستاندى TikTok-تىڭ ورتالىق ازياداعى digital-حابى ەتە الادى.
«TikTok-تىڭ قازاقستاندىق سەگمەنتىندە 15 مىڭ بلوگەردىڭ وقىرمان سانى مىڭنان 100 مىڭعا دەيىن بارادى. وقىرمان سانى 100 مىڭنان 1 ميلليونعا دەيىن باراتىن 300 بلوگەر، 1 ميلليوننان 56 ميلليونعا دەيىن اۋديتوريامەن جۇمىس ىستەپ جۇرگەن 45-50 بلوگەر بار. TikTok-تا 1-15 جىل بويى تۇراقتى جۇمىس ىستەپ كەلە جاتقان بلوگەرلەر ايىنا 200-400 مىڭ تەڭگە ارالىعىندا تابىس تابادى. وقىرمان سانى 100 مىڭنان اساتىنداردىڭ تابىسى 1 ميلليون تەڭگەگە دەيىن جەتەدى. ال 1 ميلليوننان استام وقىرمانى بار بلوگەرلەردىڭ تابىسى 10 ميلليون تەڭگەگە دەيىن بارادى»، - دەيدى پروديۋسەر.
سونداي- اق، TikTok پلاتفورماسىندا جاعىمسىز تەندەنتسيالار كوپ دەيتىن پىكىرلەرگە جاۋاپ بەردى.
«مىسالى، «ۆكونتاكتە» الەۋمەتتىك جەلىسىندە وزگە پالتفورمالاردان قاراعاندا پورنوگرافيالىق مازمۇن كوپ. «تەلەگرامم» جەلىسىن ەسىرتكى جاسىرۋشىلار قالاي پايدالاناتىنىن كورىپ وتىرمىز. ال Instagram جاريالانعان كونتەنتتى بۇعاتاتتامايدى دەۋگە بولادى»، - دەيدى اسحات حاليموۆ.
ونىڭ سوزىنشە، TikTok بۇل ماسەلەلەردە وتە ساق.
«بىزدە «وتباسى باقىلاۋى» دەيتىن پايدالى فۋنكتسيا بار. وسى ارقىلى قولدانۋشىلاردى بەيادەپ كونتەنتتەن قورعاپ، پلافتورمانى قولدانۋ ەرەجەسىن قاداعالايمىز. ونىڭ ۇستىنە، 18 گە تولماعان قولدانۋشىلارىمىز ۆيدەو جۇكتەي المايدى جانە ولاردىڭ كونتەنتى بىردەن بۇعاتتالادى. دەمەك، بالالار TikTok-تا بلوگەر بولىپ، پىكىرىن بولىسە المايدى. Instagram-دا ونداي شەكتەۋ جوق»، - دەيدى ول.
بۇل سوزىنە ول «امينكا ۆيتامينكا» اتىمەن تانىلىپ كەتكەن بلوگەردىڭ TikTok-تاعى اككاۋنتتارىن مىسال ەتىپ كەلتىردى.
«قازىر ول ءتورتىنشى اككاۋنتىن اشتى. ۋاقىت وتە كەلە ونى دا بۇعاتتايدى. TikTok بوتتاردى دا انىقتاپ، بۇعاتتاپ وتىرادى. كەيبىر بلوگەرلەر ءوڭى تىم جاس بولعانى ءۇشىن جاس شەكتەۋىنەن زارداپ شەگىپ جاتادى. لۋنا دەگەن بلوگەردىڭ جاسى 22 دە بولعانىنا قاراماستان، ءتۇرى جاس بولعانى ءۇشىن عانا ەكى بىردەي اككاۋنتىن بۇعاتتاپ تاستاعان. سوندىقتان بىزدەن تاراپ جاتقان كونتەنتتى باسقارىپ، باقىلاۋ جاعى وزگە الەۋمەتتىك جەلىلەرگە قاراعاندا جولعا قويىلعان. ءبىراق ءبىزدىڭ پلاتفورمانى دا تەرىس پيعىلدا پايدالاناتىنداردىڭ بار ەكەنىن جوققا شىعارمايمىن»، - دەيدى پروديۋسەر.
سونداي-اق، ول TikTok تىكەلەي ەفيرلەردى قاتاڭ قاداعالايتىنىن ايتادى.
«تىكەلەي ەفيرگە شىعىپ تەرىس پيعىلداعى كونتەنت تاراتىپ وتىرعاندارعا 5 شاعىم تۇسسە بۇعاتتاپ تاستاي الادى. ءبىزدىڭ BIP House-دا ءبىر قىزدىڭ بىلەگى اشىق بولعانى ءۇشىن عانا ەفيرىن بۇعاتتادى. ءبىر قولدانۋشىعا ۇناماي قالىپ، 5 رەت شاعىم جىبەرگەن ەكەن. سول ءۇشىن ەفير جابىلدى»، - اسحات حاليموۆ.
پروديۋسەر ءسوز سوڭىندا قازاقستان TikTok-تى جابۋ نەمەسە شەكتەۋ تۋرالى شەشىم شىعارماي تۇرىپ، نارىقتىڭ قانشالىقتى دامىپ كەتكەنىن ەسكەرۋ كەرەك دەپ ەسەپتەيدى.
اۆتور
ەسىمجان ناقتىباي
