قازاقستان تاريحىنىڭ كوپتومدىعىن ازىرلەۋ بارىسى قارالدى

مەملەكەتتىك كەڭەسشى ەرلان قارين «ەجەلگى زاماننان بۇگىنگى كۇنگە دەيىنگى قازاقستان تاريحى» اتتى جاڭا اكادەميالىق باسىلىمنىڭ رەداكسيا القاسى مۇشەلەرىمەن كەزدەسۋ وتكىزدى.

جيىندا كوپتومدىقتى ازىرلەۋ بارىسى قارالدى، دەپ حابارلايدى Kazinform.

اكادەميالىق باسىلىمنىڭ ءار تومىنىڭ جەتەكشىلەرى - ءا. ح. مارعۇلان اتىنداعى ارحەولوگيا ينستيتۋتىنىڭ باس ديرەكتورى اقان وڭعار، جوشى ۇلىسىن زەرتتەۋ عىلىمي ينستيتۋتىنىڭ ديرەكتورى جاقسىلىق ءسابيتوۆ، ش. ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى زيابەك قابىلدينوۆ، ر. سۇلەيمەنوۆ اتىنداعى شىعىس تانۋ ينستيتۋتى جانىنداعى تاريحي ماتەريالداردى زەرتتەۋ جونىدەگى رەسپۋبليكالىق اقپاراتتىق ورتالىقتىڭ ديرەكتورى مەرۋەرت ابۋسەيىتوۆا، مەملەكەت تاريحى ينستيتۋتىنىڭ ديرەكتورى بۇركىتباي اياعان مەملەكەتتىك كەڭەسشىنى جالپى الەمدىك ۇدەرىستەر اياسىندا قازاقستان تاريحىنىڭ نەگىزگى كەزەڭدەرى قالاي جازىلىپ جاتقانىنان حاباردار ەتتى.

كەزدەسۋ قورىتىندىسى بويىنشا ەرلان قارين عىلىمي ءىس ساپار بارىسىندا شەتەل ارحيۆتەرىنەن تابىلعان ءتول تاريحىمىزعا قاتىستى جاڭا مۇراعات قۇجاتتارى جانە سوڭعى جىلدارداعى ارحەولوگيالىق زەرتتەۋلەردىڭ قورىتىندىلارى وسى ىرگەلى عىلىمي ەڭبەككە ەنۋگە ءتيىس ەكەنىن اتاپ ءوتتى.

سونداي- اق مەملەكەتتىك كەڭەسشى ساپالى باسىلىم ازىرلەۋ ءۇشىن عالىمداردىڭ بۇل جۇمىسقا جاۋاپكەرشىلىكپەن قاراۋى، اۆتورلار مەن رەداكتورلاردىڭ تىنىمسىز ەڭبەك ەتۋى وتە ماڭىزدى ەكەنىن ايتتى.