قازاقستان تاريحىنا قاتىستى بىرەگەي قۇجاتتاردىڭ كورمەسى ءوتتى
استانا. KAZINFORM - قازاقستان رەسپۋبليكاسىنىڭ ۇلتتىق ارحيۆىندە قازاقستان رەسپۋبليكاسى مادەنيەت جانە اقپارات مينيسترلىگىنىڭ ۇيىمداستىرۋىمەن «ارحيۆ - 2025: ناتيجەلەر مەن ماسەلەلەر» اتتى رەسپۋبليكالىق عىلىمي-تاجىريبەلىك كونفەرەنسيا ءوتتى.
بۇل تۋرالى ۆەدومستۆونىڭ باسپا ءسوز قىزمەتى ءمالىم ەتتى.
ءىس-شارا «ارحيۆ-2025» جوباسى اياسىندا شەتەلدەردەگى قازاقستانعا قاتىستى قۇجاتتاردى انىقتاۋ، كوشىرۋ، سيفرلاۋ جانە جاريالاۋ باعىتىندا جاسالعان جۇمىستاردى تالقىلاۋعا ارنالدى.
كونفەرەنسياعا ق ر مادەنيەت جانە اقپارات مينيسترلىگىنىڭ وكىلدەرى رەسپۋبليكالىق جانە وڭىرلىك مەملەكەتتىك ارحيۆتەردىڭ قىزمەتكەرلەرى، تاريحشىلار قاتىستى.
كونفەرەنسيا شەڭبەرىندە قازاقستان تاريحىنا قاتىستى بىرەگەي قۇجاتتاردىڭ كورمەسى ۇيىمداستىرىلدى. ەكسپوزيتسيادا رەسەي، گەرمانيا، موڭعوليا، بەلارۋس، ارمەنيا، تۇركيا سياقتى مەملەكەتتەردىڭ ارحيۆتەرىنەن اكەلىنگەن قۇجاتتار قويىلدى. ونىڭ قاتارىندا ستۋدەنت جۇمابايەۆ ماعجان بەكەن ۇلىنىڭ 1923-1925-جىلدارداعى جەكە ءىسى، 1334-جىلى سۇلتان كەزىندە ءاز جانىبەك حانعا ارنالىپ جازىلعان تاريحي قولجازبا، 918-جىلى تەمىر حاننىڭ سايبەك حانعا ەلشى جىبەرىپ، بۇرىندىقپەن مامىلەگە كەلۋى تۋرالى دەرەكتەر، 1784-جىلعى قازاق دالاسىنداعى كونە قالالاردىڭ كورىنىسى، سونداي-اق ورتا ازيادان كوشكەن 3000 قازاق ماسەلەسىنە قاتىستى شەشىمدەر، ولاردى كاشميرگە قابىلداۋ سياقتى قۇندى قۇجاتتاردىڭ كوشىرمەسى قويىلدى.
ءىس-شارا اياسىندا «ماتەريالى ي دوكۋمەنتى روسسيسكوگو گوسۋدارستۆەننوگو ۆوەننو-يستوريچەسكوگو ارحيۆا پو يستوري كازاحستانا XIX ۆەكا» اتتى قۇجاتتار جيناعىنىڭ تۇساۋكەسەرى ءوتتى.
ەسكە سالا كەتەيىك، بۇعان دەيىن قورعانىس مينيسترلىگىنىڭ ورتالىق ارحيۆىنە ءۇش مىڭعا جۋىق مۇراعات ءىسى ساقتاۋعا بەرىلگەنىن جازعان بولاتىنبىز.
