قازاقستان تاراپى ۇشاق اپاتىن جان-جاقتى زەرتتەۋگە بار كۇش-جىگەرىن سالادى - پرەزيدەنت
استانا. KAZINFORM - مەملەكەت باسشىسى ازەربايجان پرەزيدەنتىمەن تەلەفون ارقىلى سويلەستى. بۇل تۋرالى اقوردا ءمالىم ەتتى.
— پرەزيدەنتتەر قايعىلى وقيعاعا بايلانىستى ءبىر-بىرىنە كوڭىل ايتىپ، ماڭعىستاۋ وبلىسىندا اپاتقا ۇشىراعان Azerbaijan Airlines ۇشاعىندا قازا تاپقان ازاماتتاردىڭ وتباسىلارى مەن جاقىندارىنا سابىر تىلەدى، - دەلىنگەن حابارلامادا.
قاسىم-جومارت توقايەۆ وقيعانى تەرگەۋ جونىندەگى ارنايى مەملەكەتتىك كوميسسيا جۇمىسى تۋرالى مالىمەت بەرىپ، قازاقستان تاراپى ۇشاق اپاتىن جان-جاقتى جانە وبەكتيۆتى تۇردە زەرتتەۋگە بار كۇش-جىگەرىن سالاتىنىن جەتكىزدى.
يلحام اليەۆ ىزدەستىرۋ-قۇتقارۋ جۇمىستارىن جۇرگىزۋ جانە زارداپ شەككەندەرگە كومەك كورسەتۋ بويىنشا شۇعىل ارەكەت ەتكەنى ءۇشىن قازاقستان ۇكىمەتىنە العىس ايتتى.
تاراپتار قايعىلى وقيعانىڭ ءمان-جايى تولىقتاي انىقتالعانشا ەكى ەل ۇكىمەتتەرىنىڭ قۇرىلىمدارى تىعىز بايلانىستا بولادى دەپ ۋاعدالاستى.
ايتا كەتەلىك، شي جينپيڭ پرەزيدەنتكە كوڭىل ايتۋ جەدەلحاتىن جولدادى.
