قازاقستان تاەكۆوندو فەدەراتسياسىنىڭ جاڭا پرەزيدەنتى سايلاندى

استانا. قازاقپارات - 6-قىركۇيەك كۇنى استانادا قازاقستاندىق تاەكۆوندو (WT) فەدەراتسياسى مۇشەلەرىنىڭ كەزەكتەن تىس جينالىسى ءوتتى. كۇن تارتىبىندە بىرنەشە ماسەلە قاراستىرىلىپ، فەدەراتسيانىڭ جاڭا پرەزيدەنتى سايلاندى.

ۇلتتىق وليمپيادالىق كوميتەتتىڭ مالىمەتىنشە، جيىنعا قاتىسقان 20 وبلىستىق فەدەراتسيا مەن سپورتتىق ۇيىمداردىڭ وكىلدەرىنەن ۇسىنىلعان كانديداتۋرانى 14 ادام قولداعان. ناتيجەسىندە قازاقستاندىق تاەكۆوندو (WT) فەدەراتسياسىنىڭ پرەزيدەنتى رەتىندە شاميەۆ كۋدرات يگنات ۇلى سايلاندى.

«جەكە ماقساتتارىمنىڭ جەتەگىندە ەمەس، ەل مۇددەسى ءۇشىن وسى قىزمەتكە كەلىپ وتىرمىن. الدا لوس اندجەلەس وليمپياداسى بار، ءبىراق ءبىزدىڭ جۇمىس ستراتەگيامىز ءبىر وليمپيادالىق كەزەڭمەن شەكتەلمەي، 20 جىلعا باعىت-باعدارىمىز ايقىن بولۋى ءتيىس. ءار سپورتشىنىڭ تولىققاندى دايىندىعى ءۇشىن قاجەتتىنىڭ بارلىعىن ۇسىنىپ، كەز كەلگەن دەڭگەيدەگى جارىستى ءادىل وتكىزۋ - بىزگە ارتىلعان امانات دەپ بىلەمىن. ق ر تۋريزم جانە سپورت مينيسترلىگى جانە ۇلتتىق وليمپيادا كوميتەتىمەن بىرگە ءبىر جۇدىرىقتاي جۇمىلىپ جۇمىس ىستەيمىز»، - دەدى شاميەۆ ءوز سوزىندە.

ايتا كەتەلىك، شاميەۆ بۇل قىزمەتتە ۆياچەسلاۆ كيمدى الماستىرعان بولاتىن.

انىقتاما: شاميەۆ كۋدرات يگنات ۇلى – كاسىپكەر - مەتسەنات، 34 جاستا، ازيا-تىنىق مۇحيتى تەحنولوگيا جانە يننوۆاتسيالار ۋنيۆەرسيتەتىندە «حالىقارالىق بيزنەستى باسقارۋ» ماماندىعى بويىنشا ءبىلىم العان، ەڭبەك ءوتىلى 12 جىل، قازىرگى ۋاقىتتا «Integra Construction KZ» ج ش س باقىلاۋ كەڭەسىنىڭ ءتوراعاسى، 2021-جىلى «ەرەن ەڭبەگى ءۇشىن» مەدالىمەن ماراپاتتالدى.