قازاقستان سىبايلاس جەمقورلىقتى قابىلداۋ يندەكسىندەگى ورنىن جاقسارتتى

قازاقستان Transparency International رەيتينگىندە ءوز پوزيتسياسىن جاقسارتتى، - دەپ حابارلايدى Massaget.kz ءتىلشىسى.

سىبايلاس جەمقورلىقتى قابىلداۋ يندەكسىنە سايكەس، 2023-جىلدىڭ قورىتىندىسى بويىنشا قازاقستان رەيتينگىدە 8 ورىنعا كوتەرىلىپ، 180 ەل اراسىندا 93-ورىنعا يە بولدى (2022-جىل - 101-ورىن).

قازاقستان العاش رەت 100 دەن 39 بال جينادى، بۇل بىلتىرعىمەن سالىستىرعاندا 3 بالعا ارتىق. بال نەعۇرلىم جوعارى بولسا، سىبايلاس جەمقورلىق سوعۇرلىم از بولادى.

«Transparency International رەيتينگى مەملەكەتتىك سەكتورداعى سىبايلاس جەمقورلىق دەڭگەيىن ساراپتامالىق جانە بيزنەس-باعالاۋعا نەگىزدەلگەن. الەمدىك ورتاشا كورسەتكىش 10 جىل بويى وزگەرىسسىز قالدى جانە بۇل - 43 بال»، - دەلىنگەن حابارلامادا.

ەلدەردىڭ ۇشتەن ەكىسىنەن استامى 50 دەن از ۇپاي جينايدى، ال 27 ەل رەيتينگ تاريحىنداعى ەڭ تومەنگى ۇپاي جينادى.

«شىعىس ەۋروپا جانە ورتالىق ازيا» ءوڭىرىنىڭ ورتاشا بالى (19 ەل) 35.

ايماقتاعى كوشباسشىلار - گرۋزيا (53)، ارمەنيا (47)، چەرنوگوريا (46).

اۋتسايدەرلەر اراسىندا رەسەي (26)، قىرعىزستان (26)، تاجىكستان (20)، تۇرىكمەنستان (18) بار.

وسىلايشا، ورتالىق ازيا ءوڭىرى ەلدەرىنىڭ ىشىندە قازاقستان ەڭ جوعارى پوزيتسيانى يەلەنەدى.