قازاقستان سۋپەر كومپيۋتەرلەر بايگەسىنە قاتىسا الا ما

 استانا. KAZINFORM -استانادا سۋپەر كومپيۋتەر تەحنولوگيالارىنىڭ جاھاندىق بايگەسىندەگى قازاقستاننىڭ ءرولى تالقىلاندى.

نازاربايەۆ ۋنيۆەرسيتەتى فيزيكا كافەدراسىنىڭ قاۋىمداستىرىلعان پروفەسسورى ەرنازار ابدىكامالوۆ قۋاتتى ەسەپتەۋىش ماشينالاردىڭ زاماناۋي تەحنولوگيالارى اۋا رايىن قولدان وزگەرتۋدەن باستاپ عالامدى زەرتتەۋگە دەيىنگى اۋقىمنىڭ ءبارىن قامتيتىنىن ايتادى.

«سۋپەر كومپيۋتەردى جاڭا ستراتەگيالىق رەسۋرس دەپ تۇسىنۋگە بولادى. قازىر سۋپەر كومپيۋتەر قۇراستىرۋ بايگەسىندەگى باسەكە وتە جوعارى. اسىرەسە گرافيكالىق پروتسەسسورلار سالاسىندا باسەكە قىزىپ تۇر. بۇل بايگەدە ازىرگە Nvidia, AMD كومپانيالارى الدا»، - دەيدى عالىم.

ال قىتايداعى سۋپەر كومپيۋتەرگە ارنالعان ۇلتتىق ورتالىقتار ءتۇرلى عىلىمي، ينجەنەرلىك جوبالاردىڭ ەسەبىن شىعارۋعا باعدارلانعان. جاپونيانىڭ FUGAKU سۋپەر كومپيۋتەرى 2020 -جىلى الەمدەگى ەڭ جىلدام كومپيۋتەر رەتىندە مويىندالعان. ول جاڭا دارىلەر مەن ەكولوگيالىق شەشىمدەردى ازىرلەۋگە قولدانىلادى. ال فينليانديا سۋپەر كومپيۋتەردىڭ كومەگىمەن شاعىن قالانىڭ جىلۋ جۇيەسىن باسقاراتىن جوبانى ءساتتى جۇزەگە اسىردى. استاناعا جينالعان عالىمدار قازاقستان بۇل بايگەگە ءوز جوباسىن قوسپاسا دا، وسى نارىقتىڭ جەتكىزۋ تىزبەگىنە كىرۋگە مۇمكىندىگى بار ەكەنىن ايتتى.

«ەشبىر ەل ءوز بەتىمەن سۋپەر كومپيۋتەردى باستان- اياق قۇراستىرا المايدى. قازىر سۋپەر كومپيۋتەر ءوندىرىسىنىڭ جاھاندىق تىزبەگىندە ا ق ش- تان بولەك تايۆان، نيدەرلاند، گەرمانيا سياقتى ەلدەر بەلسەندى. قازاقستان دا سول قاتارعا كىرە الادى. ول ءۇشىن ناقتى ءبىر باعىتتاردا نوۋ-حاۋدى دامىتىپ، ءوز ءونىمىن ۇسىنا الۋى كەرەك. ول ءونىمنىڭ «تەمىر» بولۋى مىندەتتى ەمەس. ءبىز باعدارلامامەن قامتاماسىز ەتۋ، ەسەپتەۋ تاسىلدەرىن جاساۋ سياقتى باعىتتارعا دەن قويا الامىز. جالپى وزىمىزدە سۋپەر كومپيۋتەر قۇراستىرىپ شىعارۋ - ىسكە اسىرۋعا بولاتىن شارۋا»، - دەيدى ەرنازار ابدىكامالوۆ.

تالقىلاۋعا قاتىسقان گەيدەلبەرگ جانە بەيجىڭ ۋنيۆەرسيتەتتەرىنىڭ پروفەسسورى، دوكتور راينەر شپۋرتسەم قىتايلىق عالىمداردىڭ ا ق ش پەن جاپونيا عالىمدارىنىڭ ىزىمەن ءوزىنىڭ ەسەپتەۋ تەحنولوگيالارىن جاساپ جاتقانىن ايتادى.

عالىمدار سۋپەر كومپيۋتەرلەردىڭ ەنەرگيا ۇنەمدەگىشتىگى نەگىزگى ورىنعا شىققانىن دا ايتادى.

«مىسالى، ا ق ش- تىڭ تەننەسي شتاتىنداعى Frontier سۋپەر كومپيۋتەرى 22 مەگاۆاتتاي قۋات تۇتىنادى. بۇل - مىڭنان استام ءۇيدىڭ تۇتىناتىن ەنەرگياسى. الەمدە دەرەكتەردىڭ كولەمى كۇن ساناپ ارتىپ كەلەدى. بىزدە جاسالاتىن سۋپەر كومپيۋتەرلەر سول قارقىنعا ىلىسە الماي جاتىر»، - دەيدى ەرنازار ابدىكامالوۆ.