قازاقستان - سان-مارينو ماتچىنان كەيىن جانكۇيەرلەر مەن ەرىكتىلەر ستاديوننىڭ قوقىسىن جينادى
استانادا جانكۇيەرلەر ەرىكتىلەرمەن بىرگە قازاقستان مەن سان-مارينو قۇرامالارى اراسىنداعى ماتچتان كەيىن ستاديوننىڭ قوقىسىن جينادى، دەپ حابارلايدى Kazinform ەلوردا اكىمدىگىنىڭ رەسمي سايتىنا سىلتەمە جاساپ.
ەلوردالىق ەرىكتىلەر مەن جانكۇيەرلەر توبى ەۋرو-2024 ىرىكتەۋ اياسىندا قازاقستان قۇراماسىنىڭ سان-مارينو كومانداسىنا قارسى ماتچىنان كەيىن « استانا ارەنا» ستاديونىندا قوقىس جينادى.
فۋتبول جانكۇيەرلەرى مەن ەلوردا تۇرعىندارىنىڭ بەلسەندىلىگى عانا ەمەس، ولاردىڭ تازالىعى كىمدى بولماسىن تاڭعالدىردى. ويتكەنى تازالىق جۇمىسىنا « استانا جاستارى» كمم بەلسەندىلەرى مەن ەرىكتىلەرى دە، استانانىڭ تۇرعىندارى دا اتسالىستى.
ايتا كەتەيىك، فۋتبولدان 2024-جىلعى ەۋروپا چەمپيوناتىنا ىرىكتەۋ ساتىسى جەتىنشى تۋرىندا قازاقستان قۇراماسى سان-مارينودان باسىم ءتۇستى.
مەملەكەت باسشىسى قاسىم-جومارت توقايەۆ قازاقستان ۇلتتىق قۇراماسىنىڭ سان-مارينو كومانداسىنا قارسى ويىنىنا قولداۋ كورسەتۋ ءۇشىن «استانا ارەنا» ستاديونىنا كەلدى.
مەملەكەت باسشىسىمەن بىرگە ۇلتتىق قۇراماعا قولداۋ ءبىلدىرۋ ءۇشىن داڭقتى سپورتشىلار، سپورت ارداگەرلەرى مەن مادەنيەت قايراتكەرلەرى دە كەلدى
ولاردىڭ اراسىندا قازاقستاننىڭ حالىق ءارتىسى ديماش قۇدايبەرگەن، ميني-فۋتبولدان قازاقستان ۇلتتىق قۇراماسىنىڭ باس باپكەرى پاۋلۋ ريكاردۋ فيگەيرا سيلۆا (كاكا) جانە تاعى باسقالارى بار.
كەزدەسۋ بارىسىندا قازاقستاندىق فۋتبولشىلار بىردەن شابۋىلعا كوشتى. دەسە دە وعان قارسىلاس قۇراما قورعاۋشىلارى لايىقتى توتەپ بەرە ءبىلدى.
