قازاقستان سۋ تاسقىنىنان قانداي ساباق الدى

استانا. KAZINFORM - سۋ رەسۋرستارى جانە يرريگاتسيا ءمينيسترىنىڭ ءبىرىنشى ورىنباسارى بولات بەكنياز ەلدەگى سۋ تاسقىنىنان قانداي قورىتىندى جاسالعانىن ايتىپ بەردى.

«ەڭ الدىمەن جاڭا سۋ قويمالارىن سالۋ كەرەك. قولدا بار سۋ قويمالارىن رەكونسترۋكتسيادان وتكىزۋ كەرەك. قازىرگى تاڭدا تاسقىن سۋدى جيناپ، بۇكىل سۋ قويمالارى تولدى. قازىرگى سۋ كاسپي تەڭىزىنە 1,7 ميلليارد تەكشە مەتر سۋ كەلدى، بالقاش كولىنە دە 2,5 ميلليارد تەكشە مەتر سۋ كەلدى. بۇرىن سۋ بارماعان ءشولدى جەرلەرگە دەيىن سۋ جەتتى. قىزىلوردا وبلىسىنا سارىسۋ وزەنى مەن قاراعاندى وبلىسىنان سۋ كەلدى. بۇل سۋدىڭ جينالۋىنا بايلانىستى وڭ وزگەرىس»، - دەدى مينيسترلىك وكىلى 10 رەسپۋبليكالىق ارنادا ءوتىپ جاتقان تەلەمارافوندا.

ماسەلەن، قازىر استانا سۋ قويماسىنىڭ 400 ميلليون كۋبتان استام سۋى بار. بىلتىر جەتپەگەن سۋدى ساتپايەۆ كانالى ارقىلى ەرتىستەن تارتىلعان ەدى. وسىلايشا بيىل 2 ميلليارد تەڭگە قاراجات ۇنەمدەلىپ وتىر.

سپيكەردىڭ ايتۋىنشا، 2030 -جىلعا دەيىن اقمولا، اقتوبە، ب ق و، قىزىلوردا، تۇركىستان، جامبىل، قاراعاندى، اباي، الماتى، شىعىس قازاقستان وبلىستارىندا 20 جاڭا سۋ قويماسى سالىنادى.

وعان قوسا، 15 سۋ قويماسى كۇردەلى جوندەۋدەن وتەدى.

«سونىڭ ناتيجەسىندە 200 مىڭنان استام حالقى بار 134 ەلدى مەكەندى سۋ باسۋ قاۋپى ازايادى»، - دەپ ءتۇسىندىردى ب. بەكنياز.