قازاقستان پرەزيدەنتىنىڭ اپتالىق جۇمىسىنا ۆيدەوشولۋ

 اقوردا پرەزيدەنت قاسىم-جومارت توقايەۆتىڭ 25-قىركۇيەك – 1-قازان ارالىعىنداعى اپتالىق جۇمىسىنا ۆيدەوشولۋ ۇسىندى، دەپ حابارلايدى قازاقپارات. 

مەملەكەت باسشىسى 25-قىركۇيەك قارۋلى كۇشتەردە كادرلىق اۋىس-ءتۇيىس جاسادى. اتاپ ايتقاندا، اسان ءجۇسىپوۆتى ق ر قارۋلى كۇشتەرى قۇرلىق اسكەرلەرىنىڭ باس قولباسشىسى لاۋازىمىنا بەكىتتى. تيىسىنشە، تالعات قويباقوۆ ق ر قارۋلى كۇشتەرى قۇرلىق اسكەرلەرىنىڭ باس قولباسشىسى لاۋازىمىنان بوساتىلدى.

اپتانىڭ العاشقى كۇنى ق ر پرەزيدەنتى رەسەي، بەلارۋس جانە قىرعىزستاننىڭ ۇكىمەت باسشىلارىمەن كەزدەستى.

ءدال سول كۇنى قاسىم-جومارت توقايەۆ تاتارستان رايسى رۋستام ميننيحانوۆتى قابىلدادى.

26-قىركۇيەك كۇنى مەملەكەت باسشىسى ەكس مينيستر دارحان قىدىرالىنى سەنات دەپۋتاتى ەتىپ تاعايىندادى.

سول كۇنى پارلامەنت سەناتىنىڭ دەپۋتاتى اسقار ورازالى ۇلى شاكىروۆتىڭ وكىلەتتىگى توقتاتىلدى.

27 قىركۇيەكتە قازاقستان پرەزيدەنتى تۇرىكمەنستان حالقىن تاۋەلسىزدىك كۇنىمەن قۇتتىقتاپ، جەدەلحات جولدادى.

28-قىركۇيەكتە قاسىم-جومارت توقايەۆتىڭ گەرمانياعا رەسمي ساپارى باستالدى.

پرەزيدەنت گەرمانيا كانسلەرى ولاف شولستىڭ ۆەدومستۆوسىنا بارىپ، بەتپە-بەت فورماتىندا كەلىسسوز جۇرگىزدى.

كەلىسسوزدەردەن كەيىن تىلشىلەرگە بەرگەن باسپا ءسوز ءماسليحاتىندا پرەزيدەنت قازاقستاننىڭ رەسەيمەن ەكىجاقتى تاراپتا جانە ءتيىستى ينتەگراتسيالىق بىرلەستىكتەر شەڭبەرىندە تۇراقتى دوستىق قارىم- قاتىناستا ەكەنىن ايتتى. ۋكرايناداعى جاعدايعا قاتىستى قازاقستاننىڭ ۇستانىمى جونىندە پىكىر ءبىلدىردى. ءوزارا ايىپتاۋلاردى توقتاتىپ، ىسكەرلىك كەلىسسوزدەر جۇرگىزۋگە شاقىردى.

قازاقستان مەن گەرمانيانىڭ ءىرى جانە ورتا بيزنەستەرى اراسىندا ماڭىزدى كوممەرتسيالىق كەلىسىمدەر بەكىتىلدى.

مەملەكەت باسشىسى گەرمانيانىڭ فەدەرالدىق كانسلەرىمەن كەڭەيتىلگەن قۇرامدا كەلىسسوز جۇرگىزدى.

بۇدان بولەك، قاسىم-جومارت توقايەۆ ورتالىق ازيا مەملەكەتتەرى باسشىلارىنىڭ گەرمانيا پرەزيدەنتىمەن كەزدەسۋىنە قاتىستى.

ايتا كەتسەك، مەملەكەت باسشىسىنىڭ گەرمانياعا ساپارىنا قاتىستى ق ر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى قاۋىپسىزدىك ءبولىمىنىڭ باسشىسى داۋرەن ابەن قازاقستان ديپلوماتياداعى مەدياتور رولىنە قايتا ورالاتىنىنا بولجام جاسادى. ونىڭ ايتۋىنشا، گەرمانياداعى ساپارىندا پرەزيدەنت قاسىم-جومارت توقايەۆ قازاقستان رەسەي-ۋكراينا شيەلەنىسىن شەشۋدىڭ قانداي دا ءبىر جولىن ۇسىنىپ جاتقان ەلدەردىڭ نەمەسە مەملەكەتتەر توبىنىڭ تالپىنىسىن قولدايتىنىن ايتقان.

ءماجىلىس دەپۋتاتى نيكيتا شاتالوۆتىڭ پىكىرىنشە، ق ر پرەزيدەنتى گەرمانياعا ساپارىندا پاراساتتى ديپلوماتياعا ايرىقشا ءمان بەردى.

ودان بولەك، ق ر پرەزيدەنتى جانىنداعى ق س ز ي الماتى قالاسىنداعى وكىلدىگىنىڭ باس عىلىمي قىزمەتكەرى ەربولات سەيلەحانوۆ ق. توقايەۆتىڭ گەرمانياعا ساپارى ىنتىماقتاستىققا قۋاتتى سەرپىن بەرەدى دەگەن پىكىرىن ءبىلدىردى.