قازاقستان رەسەيدىڭ ەڭ ءىرى ساۋدا سەرىكتەستەرىنىڭ بەستىگىنە كىردى
استانا. KAZINFORM - مەملەكەت باسشىسى قاسىم-جومارت توقايەۆ رەسەي پرەزيدەنتى ۆلاديمير پۋتيننىڭ قازاقستانعا جاساعان مەملەكەتتىك ساپارى اياسىندا وتكەن بريفينگىدە قول قويىلعان ماڭىزدى قۇجاتتاردى اتادى.
«كەلىسسوزدەر بارىسىندا ەكونوميكا ماسەلەلەرىنە باسىمدىق بەرىلدى. ستراتەگيالىق سالالارداعى ىنتىماقتاستىقتى تەرەڭدەتۋ جانە ءوزارا تاۋار اينالىمىن ودان ءارى ۇلعايتۋ ەكونوميكالىق بايلانىستاردىڭ نەگىزگى مىندەتى رەتىندە بەلگىلەندى. وسى ماقساتتا 2021-2025-جىلدارعا ارنالعان ەكونوميكالىق ىنتىماقتاستىقتىڭ كەشەندى باعدارلاماسىن جانە 2024-2026-جىلدارعا ارنالعان بىرلەسكەن ءىس-قيمىل جوسپارى سياقتى ۇكىمەتارالىق قۇجاتتار پاكەتى قابىلداندى»، - دەدى قاسىم-جومارت توقايەۆ.
مەملەكەت باسشىسى باشقۇرتستان استاناسىندا وتكەن ءوڭىرارالىق ىنتىماقتاستىق فورۋمنىڭ ناتيجەسىنە دە توقتالدى.
«فورۋم اياسىندا ەكى ەلدىڭ ءوڭىرارالىق جانە شەكارا ماڭىنداعى ىنتىماقتاستىعىنىڭ جاڭارتىلعان ۇكىمەتارالىق باعدارلاماسىنا قول قويىلدى. رەسەي - قازاقستاننىڭ باستى ساۋدا سەرىكتەستەرىنىڭ ءبىرى جانە ءبىزدىڭ ەكونوميكامىزداعى جەتەكشى ينۆەستورلاردىڭ ۇشتىگىنە كىرەدى.
ءوز كەزەگىندە، قازاقستان ەكىجاقتى قاتىناستار تاريحىندا العاش رەت رەسەيدىڭ ەڭ ءىرى ساۋدا سەرىكتەستەرىنىڭ بەستىگىنە كىردى. بۇل ءبىزدىڭ ىنتىماقتاستىعىمىزدىڭ بەرىك جانە جوعارى الەۋەتىنىڭ بار ەكەنىن ايعاقتايتىنى ءسوزسىز، - دەدى پرەزيدەنت.
