قازاقستان-رەسەي اراسىنداعى تاۋار اينالىمى $350 ميلليوننان استى - ءاليحان سمايىلوۆ

Kazakhstan - Bashkortostan
Photo credit: primeminister.kz

استانا. KAZINFORM - قازاقستان پرەمەر-ءمينيسترى ءاليحان سمايىلوۆ استاناعا دەلەگاتسيامەن كەلگەن رەسەي فەدەراتسياسى باشقۇرتستان رەسپۋبليكاسىنىڭ باسشىسى رادي حابيروۆپەن كەزدەستى - دەپ جازادى ق ر پرەمەر-ءمينيسترىنىڭ رەسمي اقپاراتتىق رەسۋرسى.

رەسەي قازاقستاننىڭ نەگىزگى ساۋدا-ەكونوميكالىق ارىپتەستەرىنىڭ ءبىرى.

بۇعان 2022-جىلى تاۋار اينالىمى كولەمىنىڭ %10 عا ءوسىپ، $27 ميللياردقا جەتكەنى دالەل.

وتكەن جىلدىڭ 11 ايىندا دا اراداعى ساۋدا-ساتتىق جاقسى ناتيجە كورسەتىپ، شامامەن $24 ميللياردتى قۇرادى.

«قازاقستان-رەسەي ساۋدا قاتىناستارىنىڭ دامۋىنا باشقۇرتستان رەسپۋبليكاسى ەلەۋلى ۇلەس قوسۋدا. اتالعان كەزەڭدە وڭىرلەر اراسىنداعى تاۋار اينالىمى $350 ميلليوننان استى. وسى رەتتە اراداعى ساۋدا-ەكونوميكالىق بايلانىستاردى ودان ءارى كەڭەيتۋ ءۇشىن زور الەۋەت بار»، - دەدى ءاليحان سمايىلوۆ.

ءوز تاراپىنان باشقۇرتستان باسشىسى ونەركاسىپ كووپەراتسياسىن ودان ءارى تەرەڭدەتۋگە جانە ساۋدا قاتىناستارىن دامىتۋعا قىزىعۋشىلىق تانىتتى.

«ءبىزدىڭ كاسىپورىندارىمىزدىڭ ەكونوميكالىق ىنتىماقتاستىعى ارتىپ كەلەدى. مۇمكىندىكتەر ەندى عانا ىسكە اسىرىلا باستالعانىن كورىپ وتىرمىز. تاۋار اينالىمىن ودان ءارى ۇلعايتۋ الداعى جىلدارداعى ورتاق مىندەتىمىز دەپ سانايمىن. بۇل ءۇشىن ءتيىستى العىشارتتاردىڭ بارلىعى بار»، - دەدى رادي حابيروۆ.

سوڭعى جاڭالىقتار