قازاقستان قىتايلىقتار ءۇشىن جاڭا تانىمال تۋريستىك باعىتقا اينالا باستادى - شەتەلدەگى قازاق باسپا ءسوزى
استانا. KAZINFORM - Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
قازاقستان قىتايلىقتار ءۇشىن جاڭا تانىمال تۋريستىك باعىتقا اينالا باستادى - «حالىق گازەتى»
بىلتىر قاراشا ايىندا قىتاي- قازاقستان ۆيزاسىز كەلىسىمى كۇشىنە ەنگەننەن بەرى ەكى ەل اراسىندا تۋريستىك ساپار ىڭعايلى بولىپ، قىتايلىق تۋريستەردىڭ قازاقستانعا ءتۋريزمى قىزا ءتۇستى. قازاقستان ەلىمىز ءۇشىن جاڭا تانىمال تۋريستىك باعىتقا اينالا باستادى. تۋريستىك تاپسىرىستار ايتارلىقتاي ءوستى، دەپ حابارلايدى قىتايلىق «حالىق گازەتى» باسىلىمى.
اتالعان ب ا ق-تىڭ دەرەگىنشە، ءبىرقاتار تۋريستىك اگەنتتىك پەن ونلاين-تۋريستىك كومپانيادان العان اقپاراتقا سايكەس، قىتايلىق تۋريستەردىڭ قازاقستانعا بارۋ جوسپارى مولايا باستاعان.
وسى جىلدان باستاپ قىتايلىق تۋريستەردىڭ قازاقستانعا ساپارلارىنا تاپسىرىستار سانى 2019 -جىلمەن سالىستىرعاندا %262 عا ءوستى. نەگىزىنەن ءۇرىمجى، بەيجىڭ، شاڭحاي، شىنجىن، گۋاڭجوۋ، حاڭجوۋ، شيان، چىڭدۋ، سۋجوۋ جانە چيڭداۋ سياقتى قالالاردان اۋە بيلەتتەرى مەن قوناقۇيلەرگە ەڭ كوپ تاپسىرىس تۇسكەن.
«Flying Pig دەرەكتەرى ناۋرىز ايىنان باستاپ قازاقستانعا اۆيابيلەتتەردى برونداۋ سانى ايتارلىقتاي وسكەنىن، الماتى، استانا، اقتاۋ جانە باسقا دا جەرلەر باستى باعىتقا اينالعانىن كورسەتەدى»، - دەپ جازادى قىتايلىق ب ا ق.
تاشكەنتتەن الماتى مەن استاناعا اپتاسىنا 20 رەيس ورىندالادى - «ءوز ا»
«Uzbekistan Airways» ۇلتتىق اۋە كومپانياسى كوكتەمگى- جازعى ۇشۋ كەستەسىنە اۋىسۋىنا بايلانىستى تاشكەنت قالاسىنان قازاقستاننىڭ الماتى مەن استانا قالالارىنا اپتاسىنا 20 رەيس ورىندالادى، دەپ حابارلايدى «ءوز ا» اقپارات اگەنتتىگى.
اتاپ ايتقاندا، تاشكەنتتەن الماتىعا ۇشاتىن رەيستەر اپتاسىنا 14 رەتكە دەيىن كوبەيتىلەدى. جاڭا رەيستەر دۇيسەنبى، سەيسەنبى، سارسەنبى جانە جۇما كۇندەرى ورىندالادى.
ال، اۋە كومپانياسىنىڭ ۇشاقتارى ەندى تاشكەنتتەن استاناعا اپتاسىنا 6 رەت ۇشادى. سەنبى كۇندەرى دە رەيستەر جولعا قويىلعان.
سونداي-اق وسى اپتادا «ءوز ا» اقپارات اگەنتتىگىندە «قاراقالپاقستاندا «ارال تۋريزمى» اپتالىعى وتەدى» دەگەن تاقىرىپتاعى اقپارات جاريالاندى.
اتالعان ب ا ق-تىڭ مالىمەتىنشە، 2024 -جىلدىڭ 16-19-ءساۋىر كۇندەرى قاراقالپاقستان رەسپۋبليكاسىنىڭ نوكىس قالاسى مەن مويناق اۋدانىندا «ارال تۋريزمى» اپتالىعى وتپەك.
تۋريزم كوميتەتىنىڭ حابارلاۋىنشا، اپتالىقتا «ارالدىڭ ىزگىلىك ەلشىلەرى» حالىقارالىق عىلىمي- تاجىريبەلىك كونفەرەنسياسى، «ارال سۋرەتشىلەر كوزىمەن» شىعارماشىلىق كورمەسى مەن پلەنەر جانە «Aral Dea Eco Race» جارىسى وتەدى. سونداي-اق جاس اۋەسقوي جانە كاسىبي سۋرەتشىلەردىڭ ارال جايلى سۋرەتتەرى كورسەتىلەدى.
«سونىمەن قاتار ءىس-شاراعا قاتىسۋشىلاردى «ارال بالىقتارىنان جاسالعان تاعامداردىڭ 99 ءتۇرى» گاسترونوميالىق فەستيۆالى مەن تاريحي ەسكەرتكىشتەرگە ۇمىتىلماس ساياحاتتار كۇتىپ تۇر»، - دەپ جازدى «ءوز ا».
يرانعا بارعان قاز ۇ ۋ-دىڭ وقىتۋشىلارى ارنايى باعدارلاماعا قاتىستى - Parstoday
ءال-فارابي اتىنداعى قاز ۇ ۋ تاياۋ شىعىس جانە وڭتۇستىك ازيا كافەدراسىنىڭ وقىتۋشىلارى ا. ج. بورانبايەۆا مەن ع. ءا. قامباربەكوۆا يران ەلىنە بارعان ءىسساپارىندا ۇلتتىق تەلەراديو بىرلەستىگىنىڭ 4-ارناسى ۇيىمداستىرعان ناۋرىز مەرەكەسىنە ارنالعان «سارزامين-ي شەر» (پوەزيا ەلى) اتتى ارنايى باعدارلاماعا قاتىستى.
بۇل تۋرالى يراننىڭ «Parstoday» اقپارات اگەنتتىگى حابارلادى.
اتالعان باسىلىمنىڭ كەلتىرگەن مالىمەتىنە سۇيەنسەك، باعدارلامادا ناۋرىز مەرەكەسىن تويلايتىن كوپتەگەن ەلدىڭ، اتاپ ايتقاندا ارمەنيا، ءۇندىستان، تۇركيا، پاكىستان جانە قازاقستاننىڭ يرانتانۋشى ماماندارى باس قوسقان.
باعدارلاما بارىسىندا قازاقستاندا ناۋرىز مەرەكەسىن تويلاۋدىڭ ەرەكشەلىكتەرى مەن يرانداعى ناۋرىز مەرەكەسىنە ۇقسايتىن تۇستارى جان-جاقتى ءسوز بولدى. سونىمەن قاتار ناۋرىز مەرەكەسىنە شاشۋ رەتىندە ءار ەلدەن كەلگەن يرانتانۋشىلار جۋىردا جارىق كورگەن جاڭا باسىلىمدارىن تانىستىردى. قازاقستاندىق يرانتانۋشىلار جاقىندا جارىق كورگەن پارسىشا- قازاقشا فرازەولوگيالىق سوزدىك تۋرالى بايانداپ بەردى.
سونداي-اق ءال-فارابي اتىنداعى قاز ۇ ۋ وقىتۋشىلارى ميراس ماكتۋب عىلىمي زەرتتەۋ ينستيتۋتىنىڭ ديرەكتورىمەن كەزدەسكەن.
سونىمەن قاتار ءال-فارابي اتىنداعى قاز ۇ ۋ وقىتۋشىلارى يران تانۋ قاۋىمداستىعىنىڭ توراعاسىمەن كەزدەسكەن.
ءال- فارابي اتىنداعى قاز ۇ ۋ تاياۋ شىعىس جانە وڭتۇستىك ازيا كافەدراسىنىڭ وقىتۋشىلارى ا. ج. بورانبايەۆا مەن ع. ءا. قامباربەكوۆا يران ەلىنە ءىسساپار بارىسىندا تەگەران ۋنيۆەرسيتەتىنىڭ پروفەسسورى، يراننىڭ كونە تىلدەرى مەن مادەنيەتى ماماندىعى بويىنشا دوكتور م. جافاري دەھاقي مىرزامەن كەزدەستى.
قازاق ۇلتتىق ۋنيۆەرسيتەتى تاياۋ شىعىس جانە وڭتۇستىك ازيا كافەدراسىنىڭ وقىتۋشىلارى ا. ج. بورانبايەۆا مەن ع. ءا. قامباربەكوۆا يران ەلىنە ءىسساپار بارىسىندا 2024 -جىل 19-ناۋرىز كۇنى اللامە تاباتاباي ۋنيۆەرسيتەتىنىڭ دوكتورى، يران بەيبىتشىلىكتى زەرتتەۋ قاۋىمداستىعىنىڭ ديرەكتورى دوكتور م. تيشەيار حامىممەن كەزدەسكەن.
ۋنيۆەرسيتەتتىڭ وقىتۋشىلارى يراننىڭ مەحر اقپارات اگەنتتىگىنە دە سۇحبات بەرگەن.
ستامبۋلعا ەكى ايدا 2,5 ميلليونعا جۋىق شەتەلدىك تۋريست كەلگەن - TRT
تۇركيانىڭ تۋريزمدەگى الدىڭعى قاتارداعى قالالارىنىڭ ءبىرى ستامبۋل جىلدىڭ العاشقى 2 ايىندا 2 ميلليون 457 مىڭ 518 شەتەلدىك قوناقتى قابىلدادى.
تۇركيانىڭ مادەنيەت جانە تۋريزم مينيسترلىگىنەن جاسالعان مالىمدەمەگە قاراعاندا قاڭتار جانە اقپان ايلارىندا ستامبۋلعا كەلگەن شەتەلدىك تۋريست سانى وتكەن جىلدىڭ بىردەي كەزەڭىمەن سالىستىرعاندا 8,08 پايىز ارتقان، دەپ حابارلادى تۇركيا راديو تەلەۆيزيا پورتالى.
اتالعان ب ا ق-تىڭ دەرەگىنشە، ستامبۋلدى اقپان ايىندا كوبىنە رەسەيلىكتەر تاڭداعان.
اتاپ ايتقاندا، اقپان ايىندا ستامبۋلعا رەسەي فەدەراتسياسىنان 138 مىڭ 957 ادام كەلگەن ەكەن، گەرمانيادان 95 مىڭ 465 ادام، يراننان 75 مىڭ 312 ادام، ۇلى بريتانيادان 56 مىڭ 430 ادام، فرانسيادان 48 مىڭ 902 ادام، ساۋد ارابياسىنان 43 مىڭ 415 ادام جانە مەن امەريكا قۇراما شتاتتارىنان 41 مىڭ 472 ادام كەلگەن.
قاڭتاردان ناۋرىزعا دەيىن قىتاي 1,324 ميلليون اۆتوموبيل ەكسپورتتاعان - People.cn
10-ساۋىردە قىتايدىڭ اۆتوموبيل ونەركاسىبى قاۋىمداستىعىنىڭ بەرگەن اقپاراتىنا سايكەس، قاڭتاردان ناۋرىزعا دەيىن قىتايدا اۆتوموبيل ءوندىرىسى مەن ساتىلىمىنىڭ كولەمى سايكەسىنشە 6,606 جانە 6,72 ميلليونعا جەتكەن. بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا سايكەسىنشە %6,4 جانە %10,6 وسكەن، دەپ مالىمدەيدى قىتايدىڭ «حالىق» اقپاراتتىق اگەنتتىگى.
اتالعان ب ا ق-تىڭ دەرەكتەرىنە سۇيەنسەك، قىتايدىڭ جاڭا ەنەرگەتيكالىق كولىك ءوندىرىسى مەن ساتىلىمى قارقىندى دامىپ كەلە جاتقانىن كورسەتەدى. بيىل قاڭتار- ناۋرىز ارالىعىندا قىتايدا جاڭا ەنەرگەتيكالىق كولىك ءوندىرىسى مەن ساتىلىمى سايكەسىنشە 2,115 جانە 2,09 ميلليونعا جەتتى. بۇل وتكەن جىلدىڭ سايكەس كەزەڭىمەن سالىستىرعاندا سايكەسىنشە %28,2 جانە %31,8 عا ءوسىپ، نارىقتاعى ۇلەسى %31,1 عا جەتكەن.
«قاڭتاردان ناۋرىزعا دەيىن قىتاي 1,324 ميلليون اۆتوموبيل ەكسپورتتاپ، كورسەتكىش وتكەن جىلدىڭ سايكەس كەزەڭىمەن سالىستىرعاندا %33,2 عا ءوستى. ونىڭ ىشىندە 307000 جاڭا ەنەرگەتيكالىق كولىك ەكسپورتتالدى. ءسويتىپ بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا %23,8- عا ۇلعايدى»، - دەپ جازدى Kaz.people.cn.
سونىمەن قاتار اتالعان ب ا ق-تا «وتاندىق اۋە تاكسيىنىڭ الەمدەگى العاشقى داناسى تاپسىرىلدى» دەگەن تاقىرىپتاعى اقپارات جارىق كوردى.
شاڭحايدا جاسالعان ازاماتتىق «اۋە تاكسيى» الەمدەگى العاشقى داناسىن تاپسىرعان. 1-ساۋىردەگى شىعىس قىتايداعى ۇشقىشسىز ۇشۋ اپپاراتتارىنىڭ بازاسى مەن شاڭحايداعى Fengfei Aviation Technology كومپانياسىنىڭ بەرگەن مالىمەتىنە سايكەس، Fengfei Aviation Technology كومپانياسى جاپونياداعى AAM (Advanced Air Traffic) وزىق وپەراتورىنا العاشقى eVTOL ەلەكترلىك تىك ۇشۋ جانە قونۋ ۇشاعى - شەنشيلۋندى رەسمي تۇردە جەتكىزگەن.
«قوعامدىق اقپاراتقا سايكەس، بۇل الەمدەگى ءبىرىنشى دانا ازاماتتىق توننالىق eVTOL اۋە اسپابىن جەتكىزۋ»، - دەپ جازادى «حالىق».
اۆتور
بەيسەن سۇلتان ۇلى
